PINAG-USAPAN nga ang pagpayag ni Joshua Garcia na makasama ang kanyang ex-girlfriend na si Julia Barreto sa music video ng ‘Paubaya’ ni Moira dela Torre na hanggang ngayon ay #1 on Trending sa Youtube na meron nang 19.6 million views simula nang I-upload noong Febraury 14.

Isa nga sa dahilan ni Joshua ay kaibigan niya ang mag-asawang Moira at Jason Hernandez at isa itong project na mahirap tanggihan.

Kaya naman nang mag-guest si Moira sa ASAP Natin ‘To last Sunday, natanong si Joshua ng mga kasamahang hosts na sina Enchong Dee at Kim Chiu kung paano siya napapayag na I-feature sila ni Julia sa trending music video ni Moira.

“Simple lang ang sagot ko diyan, ‘yung friendship namin nila Moi, nila Kuya Jason and Julia. ‘Yun ‘yung isa sa nagpa-oo talaga sa akin,” tugon ni Joshua.

Dagdag pa ng batang aktor, “Si Moi ‘yung nag-ask sa akin, eh. Sabi niya, ‘Okay ka ba to do this Paubaya?’      “Napakinggan ko yung kanta. Sabi ko, ‘Ang ganda nito ah. Parang saktong-sakto masyado sa amin.”

Sa video, damang-dama ang pagso-sorry nila sa isa’t-isa, na sobrang nakaka-touch at masasabing tamang closure ‘yun sa pagtatapos ng kanilang relasyon at ngayon nga ay magkaibigan pa rin ang dalawa sa kabila ng mapait na nangyari.

Kasama rin sila ni Julia nina Moira at Jason sa nagsulat ng script, “May script siya, kami ‘yung gumawa, ako, si Moi, si Kuya Jason and si Jul. Kami yung gumawa apat,” sabi pa niya.

“Siyempre may guide kung hanggang saan lang kayo. Pero ‘yung sasabihin as an actor, kung saan ka komportable siyempre, kung saan mo mararamdaman.”

Samantala, pinag-uusapan naman ngayon ng netizens nang ma-screenshot nila na nanonood daw sina Julia at Gerald Anderson ng ‘dance clip’ ni Joshua sa JoshLia fan account, na ang dating sa iba ay parang ini-stalk nila ang aktor.

Sey ng netizens: “Ito pala ang hobby ng dalawa, sumilip sa mga fan accounts ng mga ex. Happy ba talaga sila parang sa mga actions nila parang hindi at may regrets. Nanahimik na si Joshua nagpaubaya na nga dati pa. Focus na sya sa career.”

“Pati si Joshua stalk na rin. Bored ba sila na kung ano na ang ginagawa. My gulay itong dalawa umamin na kayo para mag post na mag post ng pictures kesa puro stalk sa mga exes ng isa’t isa.”

“kung di si bea, si joshua naman inisstalk nitong si hulya.. kaya to najijinx eh.”

May nag-comment naman ng, ”Na kay Joshua ang huling halakhak. Ang galawan ng dalawa parang ewan. Wag muna mag girlfriend Joshua at malayo pa ang mararating mo. Hayaan mo ang dalawang yan at palubog na ang career kaya todo papansin.”

“Nagagwapuhan talaga ako kay Joshua! Mas appealing at gwapo sya keysa kay Ge.” (ROHN ROMULO)

MUKHANG may ‘something’ na talaga between Derek Ramsay at Ellen Adarna. 

Ito na ang nakikita at halos pinaniniwalaan ng mga netizens.

Hindi masisisi nina Derek at Ellen ang netizens kahit pa “The Unbothered” ang tag sa kanila dahil sa mga ipino-post din naman nilang larawan na napaka-cozy sa isa’t-isa. Nandiyang tila nakayakap si Derek kay Ellen hanggang sa pagdya-jumping rope ng sabay.

Nasundan pa ito ng mga post ng kaibigan nila na ewan kung nabigla lang ba sa pagpu-post o sinadya talaga para ipaalam na sila na.

May pa-“So happy for both of you” na post at tila pambubuking na, “Galing… in-love ang bff ko @ramsayderek07 kay @maria.elena.adarna pero talo sa jumping rope.”

Yun nga lang, kung ang mga kaibigan nila, tila botong-boto naman sa dalawa. “Perfect match” nga raw, base sa post pa rin, sa mga netizens, mas maraming against.

Nandiyang kesyo papansin daw ang dalawa. May mga humuhula naman na hanggang 3 months lang ang mga ito then, break na.

May mga comments din na, “Ganyang-ganyan din nagsimula sina Ellen at JLC. Beach outing.”

Meron din naman na nagsasabing wala namang masama kung sila nga. Pareho naman silang single at may anak. If hindi man mag- work, at least, they tried.”

***

HINDI sa Pilipinas gustong maging artista ng panganay na anak nina Tanya Garcia at Mark Lapid na si Mischa Lapid, sa South Korea.

Fan din ito ng mga grupong BTS at Blackpink. Kaya ito agad ang sagot ni Tanya nang matanong namin kung may gustong sumunod sa yapak niya sa mga anak.

     “Naku, yung anak ko, gustong maging K-pop Idol. Yun ang gusto niya, gusto niyang mag-training sa Korea.

     “Eh, parang yun yata ang hindi ko kaya, yung mahihiwalay siya sa akin. Eh, ilang years ang training ‘di ba? At hindi naman dito yun, sa ibang bansa.”

     Pero kung talagang gustong-gusto raw at yun ang pangarap, lalo na ng panganay nilang anak na si Mischa, isa lang daw ang request niya.

     “Kung talagang papasukin niya ang pag-aartista, isa lang ang hiling ko, tapusin niya muna ang pag-aaral. Kasi, ako, hindi ko natapos ang pag-aaral ko.      “Although nakapag-college ako, pero hindi ko natapos. So, yun lang naman ang hinihingi ko, makapagtapos sila ng pag-college.”

Kung ano man daw ang naranasan niyang hirap sa pagiging isang artista na ayaw niyang maranasan ng anak, kahit konting hirap daw, gusto rin niyang makaranas ang mga ito.

     “Siyempre, as much as we want to give them the best, maganda rin yung kahit konting hirap lang na ma-experience nila para mas ma-enjoy nila yung success.

“Like ako, nag-audition ako for ‘Sana Ay Ikaw Na Nga’ at pati sa ‘Ang TV’, may mga ganun ako noon. So, sana sila rin. Hindi lahat, ibibigay na lang in a silver platter.”

Sa isang banda, magsisilbing comeback nga ni Tanya ang Babawiin Ko Ang Lahat as ang actress at bilang isang Kapuso.

Originally, maikli lang daw ang role niya pero dahil sa pandemic at hindi na sila natuloy na pumunta sa ibang bansa, pumayag na rin siya na tuloy-tuloy na siya sa buong serye na nagsisimula na noong Lunes sa GMA Afternoon Prime.

“Alam niyo, ang laking bagay na sila yung nakasama ko sa lock-in taping like sina Carmina Villarroel, John Estrada, yung mga bagets. Mas naging magaan yung lock-in, yung work. And sana kung may next man, sana sila pa rin yung kasama,” natawang sabi niya.

***

PUMAPATOL din daw si Mayor Vico Sotto sa bashers.

     “Minsan,” pag-amin niya.

“Pero dapat, hindi ka masyadong maapektuhan. Pero sa isang banda, naniniwala ako as a public servant, tinitingnan ko rin yung feedback.”

Nagpaunlak ito sa You Tube channel ni Alex Gonzaga at sumagot naman sa mga tanong sa kanya. Gaya ng lovelife na hindi raw niya priority ngayon.

“Well, sa ngayon hindi naman priority yan. Lalo na noong mag-pandemic, talagang wala pang time. Focused munan tayo sa trabaho.”

     “Supportive naman sila sa akin. Kahit medyo natakot sila para sa akin, supportive naman sila. Suwerte ako na yung parents ko, very down-to-earth din.”

     Alam na ang mga magulang nito ay sina Coney Reyes at Vic Sotto. (ROSE GARCIA)

MATULOY na kaya sa middle of March ang lock-in shoot ng first team-up nina Bea Alonzo at Alden Richards, na ipu-produce ng Viva Films at GMA Network? 

     Matagal nang pinag-usapan ang shoot ng A Moment To Remember na based sa Japanese movie at Korean drama, ready na rin pareho sina Bea at Alden na magtrabaho, dahil after ng shooting ng movie ay may kani-kaniya na ring naghihintay sa kanila na projects na gagawin, after ng shooting nila.

Naghihintay na rin ang GMA Network para sa sa susunod na teleserye ni Alden na dapat ay masimulan na nila ang taping by April, dahil may schedule na rin ito ng airing.

At si John Lloyd Cruz ay naghihintay na rin kay Bea na matapos ang project nila ni Alden para masimulan ang balik-tambalan nilang movie sa Star Cinema.

***

BINIGYAN ng commendation ni GMA Network, Inc. Chairman and CEO Atty. Felipe L. Gozon ang buong cast, creative team, at production crew ng katatapos na top-rated afternoon drama, Prima Donnas, dahil sa successful, record-breaking run ng serye.

Nagsimulang mapanood muli ang serye noong August 19, 2019 hanggang February 19, 2021, at madalas na tumanggap ang show ng mataas na rating among the Philippine afternoon TV ratings, at noong February 11, nakakuha ito ng record-high na 14.2% rating.

Kahit noong nasa height ng pandemic, patuloy na napanood ang serye at nang payagan na ng IATF na pwede nang mag-taping ang mga TV shows, isa ang Prima Donnas sa mga unang pinayagan ng lock-in taping, at pagkatapos ng two safe lock-in tapings, zero COVID-19 ang kanilang mga artista, staff at crew.

Part ng commendation ni Atty. Gozon: “The GMA Management recognizes your hard work and passion for excellence, overcoming production difficulties set before you during this time of the pandemic, to ensure that ‘Prima Donnas’ consistently embodies the Kapuso’s mission and commitment of providing only the best entertainment programs for the Filipino views worldwide and across media platforms.

     “On behalf of GMA Network, Inc, please accept my heartfelt congratulations to all of you for a job well done and for constantly bringing pride to our country. You are truly our best assets. Mabuhay kayo, mga Kapuso!”

***

SA pagtatapos ng Prima Donnas, magkakaroon ito ng book 2 at pinaghahandaan na ito ng creative team.       Ito kasi ang request ng maraming netizens and viewers ng serye, kaya bitin ang ending.  Tanong nila ano ang nangyari kay Kendra (Aiko Melendez) na matapos sabihin ng doctor na comatose siya at hindi alam kung kailan magigising, pero sa teaser bigla siyang nagising.

Paano na rin daw si Ruben (James Blanco), basta na lamang ba siya iniwan ni Lilian (Katrina Halili) at sumama na kay Jaime (Wendell Ramos)?

Kaya sa book 2, tiyak na makakasama na muli nina Mayi at Ella si Lenlen (Sofia Pablo) dahil sa April 10, she will turn 15 years old na.  Binawalan kasi si Sofia as per IATF directive, na magtrabaho dahil 14 years old pa lamang siya noon. (NORA V. CALDERON)