Kailangan ang mahigpit na kampanya laban sa mga colorum na sasakyan. Inaagawan nito ng hanapbuhay ang mga legal na pumapasada at delikado ito sa mga pasahero dahil walang personal passenger insurance ang mga colorum. Pero paano kung ang mismong polisiya na dapat panlaban sa mga colorum ay tila mas mabigat ang parusa sa mga may prangkisa? Ito ang dapat suriin muli ng mga transport officials sa umiiral na Joint Administrative Order no. 2014-01.

Pag ang sasakyang pumapasada na “for hire” ay walang prangkisa ito ay colorum. Pero may klase ng colorum kahit ang sasakyang pumapasada ay may prangkisa. Ito ay kapag nag “out of line” o kaya ay pinasada ng hindi naaayon sa prangkisa (different denomination).

Bago nagkaroon ng JAO 2014-01. Ang out of line operation ay out of line lang at hindi colorum. Pero ano ba ang nakita natin noon pa na hindi patas sa JAO.

Halimbawa na si Pedro ay may limang unit na van, at kinuhanan niya ng prangkisa, Ang limang van na ito ay nasa ilalim ng isang case number at prangkisa. Halimbawa ang biyahe ng mga van ay Fairview to Cubao, kapag lumabas sa rutang ito ay magiging out of line na isang klase ng colorum operation. Pagnahuli impounded ang van ng tatlong buwan, 200 thousand pesos ang tubos pero there’s more under JAO!

Kung nakapaloob sa prangkisa ang unit na out of line colorum ay DAMAY ANG IBANG UNITS SA PRANGKISA KAHIT WALANG KASALANAN ANG MGA DRAYBER NG MGA ITO! Kahit isa lang ang out of line sa mga units paloob sa prangkisa mistulang TINANGGALAN MO NA NG HANAPBUHAY ANG OPERATOR AT MGA DRIVERS DAHIL ANI JAO:

1. REVOCATION OF THE ENTIRE CERTIFICATION OF PUBLIC CONVENIENCE

WHERE THE APPREHENDED VEHICLE BELONGS.

1. Blacklisting of the apprehended vehicle and ALL OTHER AUTHORIZED

UNITS INCLUDED IN THE CPC FROM BEING USED AS A PUV.

1. REVOCATION OF THE REGISTRATION OF THE APPREHENDED VEHICLE

AND ALL OTHER AUTHORIZED UNITS INCLUDED IN THE FRANCHISE.

Parang pinatawan mo ng “death penalty”!

Sa kabilang banda, kung may limang van ka na WALANG prangkisa lahat. At ang isa ay nahuli, Tangging yun lang nahuli ang mapapatawan ng penalty. Parang agrabyado pa ang may prangkisa sa walang prangkisa.

At mas magiging problema ito dahil sa nais ng DOTR na i-consolidate ang mga transport sa isang corporation o kooperatiba. Ang mga units ng kasapi nito ay isasa-ilalim sa prangkisa ng Coop o Corporation. So pag ang isang kasapi ay nag out of line hagip ang lahat ng units sa JAO!

Bagama’t kailangan ma sugpo ang colorum dapat HINDI DAMAY ANG WALANG KASALANAN!

Hindi pa ba sapat ang multa na one million pesos sa bus, P200,000 sa truck, P50,000 sa jeep, P200,000 sa van, P120,000 sa sedan at P6,000 sa MC at tatlong buwan impound ang sasakyan! Kailangan ba na IDAMAY PA ANG WALANG KASALANAN?

Sana ay mapakinggan itong hinaing na ito at ibasura ang probisyong ito sa JAO. (ATTY. ARIEL ENRILE-INTON)

Susunod ang San Miguel Corporation (SMC) sa patakaran ng Toll Regulatory Board (TRB) na magpatupad ng “three-strike” policy para sa mga motoristang  gumagamit ng electronic payment collection lanes kahit na kulang na ang load credits.

“Our system is capable of monitoring repeat offenders,” wika ni SMC president at chief operating officer Ramon Ang.

Sa ilalim ng planong three-strike policy, ang mga hindi sumusunod na mga motorista ay bibigyan ng paalala para sa kanilang unang paglabag, babala naman sa ikalawang paglabag at paghuli na may kasamang multa sa ikatlong pagkakataon.

Ang pagkakaron ng patuloy na pagsisikip ng trapiko ay lagi na lamang nangyayari sa mga major toll plazas tulad ng Calamba kung saan ang mga motorista ay nagbabayad ng cash na dapat sana ay para sa mga gumagamit ng RFID.

“There has also been a significant number of cases where RFID motorists with no load or insufficient load balance repeatedly use the electronic payment collection lanes, holding up other motorists and causing traffic,” dagdag ni Ang.

Sa pamamagitan ng three-strike policy, ang pamahalaan ay umaasa na  mawawala ang pagkabalam sa mga toll lanes at maiiwasan ang mga reklamo ng mga motoristang mayrong RFID tags at load credits.

Maglalabas ang Department of Transportation (DOTr) at TRB ng implementing rules at regulations ng nasabing policy sa madaling panahon.

Ayon naman kay alternate TRB chairman Garry de Guzman, ang nasabing policy ay naglalayon na itanim sa mga motorista ang disiplina na maglagay muna ng load bago pa sila pumasok sa mga RFID lanes upang maiwasan ang pagkaantala at kaabalahan sa mga motoristang sumusunod na gumagamit ng RFID.

“Since there are already a lot of RFID users, sad to say, there are also who are abusive. They enter RFID lanes without load. You will be surprised that based on the statistics given by the operators, there are those who enter 50 times without load,” saad ni de Guzman.

Kung kaya’t upang maresolba ang nasabing problema, ang TRB board ay sumangayon na gumawa ng three-strike policy.

Pinahayag din ng TRB na ang transition period bago ang 100 percent cashless transaction ay magpapatuloy hanggang walang further notice ang pamahalaan na dapat sana ay may deadline noong nakaraang Jan. 11.

Sa ngayon, ang pagbabayad ng cash ay tinatangap pa rin sa mga toll plazas kahit wala pa silang RFID tags. Ang paglalagay ng RFID tags ay tuloy-tuloy pa rin sa mga madaming lokasyon na binigay ng mga toll operators. (LASACMAR)

Inaasahang aaprubahan ni Pangulong Rodrigo Duterte ang rekomendasyon ng Inter-Agency Task Force on Emerging Infectious Diseases (IATF) na isailalim na sa modified general community quarantine (MGCQ) ang buong bansa simula Marso 1.

Sinabi ni Presidential Spokesman Harry Roque, maging ang mga Metro Manila mayors ay sumang-ayon na rin rito at kailangan na lamang ng pag-apruba ni Pangulong Duterte.

Ayon kay Sec. Roque, sa Lunes matapos ang meeting sa IATF iaanunsyo ni Pangulong Duterte ang kanyang rekomendasyon.

Maging ang League of Provinces of the Philippines (LPP) ay nagsabing pabor na rin sila sa pagsasailalim ng buong bansa sa MGCQ basta may otoridad ang mga gobernadors na magpatupad ng lockdown o baguhin ang kanilang quarantine status kung kinakailangan.

TANGING ang Pilipinas na lamang ang naiiwan sa mga bansa sa Southeast Asia na hindi pa bumabalik sa face-to-face classes.

Ayon kay Department of Education (DepEd) Secretary Leonor Briones na ito ang sinabi sa kanya ng UNCEF sa pakikipagpulong niya rito kamakailan.

Ayon sa Kalihim, ang face to face sa ibang bansa ay “contextualized” kung saan may iba aniya na may isang oras sa isang linggo habang ang iba naman aniya ay dalawang araw. Depende aniya sa sitwasyon.

‘Pero tayo na lang ang talagang.. hindi pa natin pinapayagan ang face to face dahil nga ang nangyari ay paglabas ng UK variant.. siyempre nag-worry ang Presidente na baka may epekto ito sa mga ating mga eskuwelahan,” ayon kay Sec. Briones.

Sa buong mundo naman kasi ay nakikita naman na karamihan sa mga bansa ay talagang nagbubkukas na ang mga ito ng kanilang mga eskuwelahan.

Magkagayon pa man ay naghahanda pa rin ang DepEd sa pagdating ng panahon na i-lift o bawiin na ni Pangulong Rodrigo Roa Duterte ang deferment ng pilot studies ng Pilipinas.

Sa ngayon ay masasabing maraming kondisyon ang dapat na ikunsidera gaya ng kailangang pumayag ang local government na gumawa ng face-to-face sa kanilang teritoryo dahil teritoryo ng mga ito iyon at saka malaki  ang mga investment ng mga local government sa mga eskuwelahan. Kailangan na may consent ng mga ito. Eliminated ang NCR sa isinama nila na 1,000 schools dahil hindi naman ito sumasailalim sa modified general community quarantine (MGCQ).

Bukod dito, kailangan din na may written consent ng mga magulang dahil nag-survey sila sa mahigit ilang milyong participants kung saan ay lumabas na may mga magulang na hindi pa rin lubos na makuha o makita kung ano ang puwedeng advantage ng pagkakaroon ng face to face classes. Kailangan  na makuha ang consent ng mga magulang upang sa gayon na may mangyaring hindi maganda ay hindi sisihin ang DepEd.

Ang pangatlo ay may kinalaman sa facility ng DepEd dahil hindi naman lahat ng facility ng DepEd ay perpekto para sa pilot study.

“Ang pinaka-bottomline namin is an assessment of IATF and DoH,” ayon sa Kalihim.

Ang pang-apat namang kondisyon ay tracking o studies na talagang ginagawa sa iba’t ibang bansa o medical journals kung ano ba aniya talaga ang epekto ng Covid-19 sa mga bata. Saan nakakapulot ang mga ito ng germs o virus na ito at ang isa sa nakikita ng DepEd na posibilidad ay transportasyon, canteen o pagkain at kung ano pa kailangan na matiyak na malinis. (Daris Jose)

IMINUNGKAHI ng ilang medical expert na palakasin na lamang ang outdoor cinema sa halip na agad na ibalik ang indoor cinema o traditional cinema para makaiwas sa peligro at posibilidad na makapitan ng covid 19 virus.

Nangangamba kasi ang mga ito sa inaasahang pagbabalik ng operasyon ng mga sinehan sa gitna ng pandemya.

Ayon kay UP-PGH College of Medicine Clinical Associate Professor Dr Menguita Padilla, kulob at air- conditioned ang mga sinehan kaya’t may posibilidad na may mai- infect sa movie goers sakalit may makalusot na carrier ng COVID.

Aniya, may iba namang paraan para matulungan ang nasa cinema industry lalo’t nasa 300,000 katao umano ang umaasa dito.

“Kami ay may suggestion: Puwede pa rin nating tulungan ang mga cinemas na kumita. Kasi sabi ni Secretary Lopez, about 300,000 people ay dependent sa cinema industry for their livelihood, baka puwedeng gawin ng mga LGUs is outdoor cinemas ‘no. Maganda naman iyong outdoor cinemas, sa park, etc.

Ang ikinatatakot ng mga doktor at kasama na kami doon is that kahit bawasan ninyo ang mga tao sa loob ng cinema – kasi kulob siya, kasi airconditioned, maaari pa ring ma-infect,” ayon kay Padilla.

“So this is just a suggestion. Tapos, finally, takot nang marami pa rin na pumunta so baka kung indoor cinemas ay hindi pa rin pumunta ang tao. So iyon lang ‘no. So those are some of our ideas, and I can answer the rest of the questions about vaccine. Me, personally as a doctor, tinanong ako ng isang tao, “Papayag ba kayo na Sinovac,” dagdag na pahayag nito.

Napaulat na di umano’y sa Marso 1 na magbabalik operasyon ang mga sinehan sa NCR na kung saan ay nagsisimula na ang konsultasyon sa mga alkalde ng Metro Manila. (Bishop Jesus “Jemba” M. Basco)