2 kulong sa baril at patalim sa Caloocan

LAGLAG sa selda ang dalawang lalaki matapos mahuli sa akto na may dalang baril at patalim habang pagala-gala sa lansangan sa Caloocan City.

Sa report ni Caloocan police chief P/Col. Ruben Lacuesta kay Northern Police District (NPD) Director P/BGen. Rizalito Gapas, dakong alas-4:30 ng madaling araw nang maaresto ng mga tauhan ng Police Sub-Station 5 sina alyas “Balong” alyas “Rudy” sa Reparo St., Brgy. 149, Bagong Barrio dahil sa pagdadala ng baril at patalim.

Nakumpiska sa mga suspek ang isang cal. 9mm na may isang magazine na kargado ng dalawang bala at isang folding knife.

Nauna rito, nakatanggap ng tawag ang SS5 mula sa Brgy. 149 at inireport sa kanila ang hinggil sa dalawang kahina-hinalang lalaki na paikot-ikot malapit sa paligid ng Barangay Hall kung saan isa sa mga ito ay armado umano ng baril.

Kaagad rumesponde sa lugar ang mga pulis subalit, nang mapansin ng mga suspek ang kanilang presensya ay nagtangkang tumakas ang mga ito ngunit nagawa naman silang makorner at maaresto ng mga parak.

Ayon kay Col. Lacuesta, mahaharap ang mga suspek sa kasong paglabag sa Art 151 of RPC, BP 6 at RA 10591 o Comprehensive Firearms and Ammunation Regulation Act. (Richard Mesa)