Wish na manahin ng anak na si Peanut: LUIS, hanga sa sobrang kabaitan ng kapatid na si RYAN CHRISTIAN

MAY pahintulot ng ABS-CBN management ang paglabas ni Luis Manzano sa pilot episode ng ‘My Mother, My Story’, ang limited talk series ni Boy Abunda na matutunghayan sa GMA-7 sa darating na Linggo, Mayo 12, 2024, 3:15 p.m.

May exclusive contract si Luis sa ABS-CBN, pero pinayagan siya na maging panauhin sa Mother’s Day special ng bagong programa ng King of Talk sa Kapuso Network.

Ilang taon na rin namang hindi napanood si Luis sa alinmang programa ng GMA 7. Mayo 13, 2012 pa raw ang last appearance ni Luis sa Siyete. Ito ay nang mag-guest ang premyadong aktor at TV host sa oriented show na ‘Showbiz Central. ‘

Ang ina na si Star for All Seasons Vilma Santos at ang kanyang bunsong anak na si Ryan Christian Recto ang surprise guests para kay Luis sa pilot telecast ng ‘My Mother, My Story.’

Very touching ang naturang episode na ayon pa sa Vilmanians friend namin na nasa istudyo rin sa tape as live episode ng naturang programa ay hindi nila napigilang lumuha.

Sobrang nadala raw si Ryan sa pagbibigay-pugay sa kanya ni Luis, na hindi alam ng asawa ni Jessy Mendiola na nanonood din sa tape as live episode ng nabangggit na programa.

***

SA pilot episode ng “My Mother My Story” ay binanggit ni Luis Manzano ang sobrang kabaitan ng kapatid niyang si Ryan Christian.

Kaya ganun na lang ang pag-asam-asam ni Luis na magmana sa ugali ng kapatid niya ang kanyang anak na si Peanut.

Siyempre, hindi naiwasang mapaluha si Ryan dahil sa papuri ng kapatid sa ina.

Teary-eyed si Ryan nang mapanood at marinig nito ang sinasabi ni Luis, huh!

Sa totoo lang, aminado rin naman si Ate Vi na sa dalawang anak niya ay si Ryan ang biniyayaan ng talento sa pag-awit.

Şey pa ng premyadong aktres ay minana daw ni Ryan ang husay nito sa pagkanta mula kay Winnie Santos, ang kanyang nakababatang kapatid na sumikat bilang singer-actress noong dekada ’70.

Si Winnie ay isa sa grupo ng ‘Apat na Sikat’ pero tinalikuran ang showbiz at pinili na manirahan sa Amerika,

Pero kahit naman daw hindi naging magaling na singer si Luis, but still hindi magpapatalo sa husay sa pagsasayaw at pagho-host.

Kahit magkaiba ang ama still, napalaki ni Ate Vi sina Luis at Ryan na may kapuri-puring ugali na may respeto at punum-puno ng paggalang sa kapwakapwa.

Open book sa publiko ang kuwento ng buhay ni Ate Vi at hindi lang ang pagiging buhay showbiz ang hinahangaan sa kanya kundi na rin ang pagiging ina at asawa ng itinalaga na Secretary of Finance ng Pilipinas na si Ralph Recto.

(JIMI C. ESCALA)