Valenzuela LGU nagbigay ng P5M halaga ng bigas sa mga naapektuhan ng oil spill sa Mindoro

Published on March 21, 2023
by @peoplesbalita

NAGBIGAY ang Pamahalaang Lungsod ng Valenzuela sa pamamagitan ng VC Cares Plus Program ng P5 milyon halaga ng bigas sa probinsya ng Oriental Mindoro at ilang mga munisipalidad na lubhang naapektuhan ng kamakailan.

Pinangunahan ang VC Cares Team ni Senator WIN Gatchalian, Vice Mayor Lorie Natividad-Borja, at City Social Welfare Operations Chief of Staff, Ms. Dorothy Evangelista, ay nagtungo sa Oriental Mindoro upang pormal na i-turnover ang donasyong mga bigas, at personal na masuri ang kalagayan ng lalawigan kung saan sila ay malugod na tinanggap nina Oriental Mindoro Governor, Humerlito Dolor, Vice Governor Ejay Falcon, at Pola Mayor Jennifer Cruz.

Ang Sangguniang Panlungsod ng Valenzuela, ay nagpasa ng Resolusyon Blg. 2748, Serye ng 2023 na nagpapahintulot kay City Mayor WES Gatchalian na maglabas ng nasabing halaga bilang tulong sa mga lugar na apektado ng oil spill.

Ito’y matapos ang isang deliberasyon na pulong na ipinatawag ng Local Disaster Risk Reduction and Management Council noong March 9 na nagtapos sa rekomendasyon na magpasa ng isang resolusyon na makatutulong upang maibsan ang sitwasyon ng mga apektadong lalawigan at mga residente nito.

Kabilang ang mga apektadong munisipalidad na makakatanggap ng rice donation, ang probinsya ng Oriental Mindoro, mga munisipalidad ng Naujan, Pola, Pinamalayan, Gloria, Bansud, Bongabong, Roxas, Mansalay, at Bulalacao.