US immigration policies, hindi pinag-usapan sa miting kay Trump- PBBM

SINABI ni Pangulong Ferdinand Marcos Jr. na hindi pinag-usapan ang ‘immigration policies’ ng Estados Unidos sa pakikipagpulong niya kay US counterpart Donald Trump sa White House, araw ng Martes.

Ani Pangulong Marcos, wala namang makabuluhang pagkakaiba ang US immigration policies mula nang magsimula ang second term ni Trump noong Enero.

Nangako naman si Trump ng mahigpit na pagpapatupad ng immigration law at mass deportation ng illegal migrants sa Estados Unidos.

”It’s not been raised; it was not, not in this forum, but of course we are well aware of the situation,” ayon kay Pangulong Marcos.

“‘I think in our estimation with what the United States is doing now… It’s not anything different [from] what they were doing before. Ito ‘yung mga may record, mga wanted, convicted, lalong-lalo na kung sila ay illegal, TNT sila, ‘yun ang mga pinapauwi nila,” dagdag na wika nito.

Nagbibigay naman ng tulong ang Philippine Embassy sa mga undocumented Filipino sa pamamagitan ng immigration lawyers na nag-alok ng legal advice at magbabalangkas ng available na opsyon para sa mga ito.

Sa kabilang dako, pinayuhan naman ni Philippine Ambassador to the US Jose Manuel Romualdez ang mga illegal immigrants—iyong mga pumasok sa Amerika na ang hawak ay tourist visas at nag-overstay—na ikonsidera ang boluntaryong pag-alis sa bansa sa halip na hintayin pa ang posibilidad na deportasyon. (Daris Jose)

-30-