Underground powerlines at communications cables, kailangan sa mga typhoon-prone sa bansa

AYON kay Agusan del Norte Rep. Lawrence Fortun, upang maprotekatahan mula sa malalakas na hangin dala ng bagyo o kalamidad ay dapat na ibaon sa lupa ang kable ng kuryente at komunikasyon.

Dapat ding ipasa ang mga panukalang batas ukol sa pagmodernisa o pag-update sa national building code at national land use policy.

Karamihan aniya sa mga siyudad, bayan, buildings, at kabahayan ay hindi matatag laban sa mga bagyo, baha at lindol.

“Sawang-sawa na ang milyung-milyong Pilipino sa epekto ng mga kalamidad, pero wala naman tayong ginagawang permanenteng solusyon, kaya paulit-ulit tayong nagpe-penitensiya tuwing may kalamidad,” anang mambabatas.

Ang kailangan aniya ay mga bagong typhoon-resilient designs na mga bahay at buildings at pagpasa ng importanteng mga panukalang batas ukol sa land use management policy at National Building Code. (Ara Romero)