Tricycle driver na tulak, kulong sa higit P.1M shabu sa Malabon

TIMBOG ang isang tricycle driver na sideline umano ang pagbebenta ng droga matapos makuhanan ng mahigit P100K halaga ng shabu sa isinagawang buy bust operation ng pulisya sa Malabon City, Huwebes ng madaling araw.

Ikinasa ng mga tauhan ni Malabon police chief P/Col. Jay Baybayan sa koordinasyon sa PDEA ang buy bust operation matapos magawang makipagtransaksyon ng isa sa mga operatiba ng Station Drug Enforcement Unit (SDEU) kay alyas “Negro”, 37, residente ng Brgy. Tonsuya na nakalita sa kanila bilang drug pusher.

Dakong alas-12:30 ng hating gabi nang dambahin ng mga operatiba ng SDEU ang suspek sa Palmario II Street, Brgy. Tonsuya, matapos bintahan ng P500 halaga ng shabu ang isang pulis na nagpanggap na buyer.

Ayon kay Col. Baybayan, nakuha sa suspek ang humigi’t kumulang 16.5 grams ng hinihinalang shabu na may katumbas na halagang P112,200, at buy bust money.

Kasong paglabag sa Sections 5 at 11 sa ilalim ng Article II ng RA 9165 o ang Comprehensive Dangerous Drug Act of 2002 ang isasampa ng pulisya kontra sa suspek sa Malabon City Prosecutor’s Office.

Binati ni NPD Acting Director P/Col. Josefino Ligan ang Malabon police sa kanilang pangako sa pagpapanatili ng kaligtasan ng mamamayan sa pamamagitan ng patuloy na kampanya nila laban sa droga. (Richard Mesa)