TRB: Toll hike sa NLEX, epektibo na bukas, Enero 20

EPEKTIBO na bukas, Martes, Enero 20, ang pagtaas ng toll rates sa North Luzon Expressway (NLEX).
“Effective January 20, 2026, adjusted toll rates at the North Luzon Expressway (NLEX) will be implemented as approved by the Toll Regulatory Board (TRB),” anunsiyo ng TRB.
Ayon sa regulatory board, kabilang sa magtataas ng toll rates ay ang ‘Open System’ o ang Balintawak, Caloocan, Mindanao Avenue hanggang North of Marilao.
Ang mga Class 1 vehicles ay magkakaroon ng P6 na pagtaas sa toll; P12 naman para sa Class 2 at P16 para sa Class 3 vehicles.
Magtataas din ng toll rates sa ‘Closed System’ o ang North of Marilao hanggang Sta. Ines, Mabalacat City, kada kilometro, VAT exclusive.
Para sa Class 1, magtataas ng P0.26; P0.65 sa Class 2 at P0.78 sa Class 3.
Para sa Subic-Tipo, may toll hike na P3 sa Class 1; P6 sa Class 2 at P7 sa Class 3.
Ang NLEX End-To-End naman o yaong mula Marilao hanggang Sta. Ines, Mabalacat City ay magkakaroon ng toll increase na P24 sa Class 1; P60 sa Class 2 at P72 sa Class 3.
“This adjustment will ensure the continued operations, maintenance, and improvements of NLEX – for a safer, faster, and more convenient travel experience for all motorists,” anang TRB.
Ang mga Class 1 vehicles ay kinabibilangan ng regular cars at sports utility vehicles (SUVs) habang ang Class 2 naman ay yaong mga bus at maliliit na truck.
Samantala, ang Class 3 vehicles ay kinabibilangan ng malalaking truck.