Training ng PBA teams balak sa MGCQ areas

Ang mga training facilities sa Modified General Community Quarantine (MGCQ) areas ang magiging sagot upang masimulan ang pagsasanay ng mga PBA teams.

Kaya naman umaasa ang pamunuan ng PBA na makakakuha ito ng go-signal mula sa Inter-Agency Task Force (IATF) para maumpisahan na ang scrimmages ng mga ito.

Sinabi ni PBA commissioner Willie Marcial na pinapayagan ang mga PBA teams na magtungo sa mga MGCQ areas para sa kanilang training camp.

Subalit nilinaw nito na kailangang nasa isang bubble setup ito gaya sa Inspire Sports Academy sa Calamba, Laguna upang masiguro na ligtas ang lahat sa coronavirus disease (COVID-19).

Base sa patakaran ng IATF, tanging sa mga MGCQ areas lamang maaaring magkaroon ng training/scrimmages gayundin ang pagtataguyod ng tournament ng mga professional leagues.