Top 6 most wanted person ng Mandaon, Masbate nalambat sa Valenzuela
- Published on July 26, 2023
- by @peoplesbalita
NAGWAKAS na ang pagtatago sa batas ng isang lalaki na nakatala bilang top 6 most wanted sa bayan ng Mandaon, Masbate matapos masakote ng pulisya sa isinagawang manhunt operation sa Valenzuela City.Kinilala ni Valenzuela police chief P/Col. Salvador Destura Jr ang naarestong akusado bilang si Mario Rubis, 43, tubong Mandaon, Masbate at residente ng Area 4, Pinalagad St., Brgy. Malinta.
Sa kanyang ulat kay Northern Police District (NPD) Acting Director P/BGen. Rizalito Gapas, nakatanggap ng impormasyon ang mga operatiba ng Warrant and Subpoena Section (WSS) ng Valenzuela police hinggil sa pinagtataguang lugar sa lungsod ng akusado.
Kaagad nagsagawa ang mga operatiba ng WSS sa pangunguna ni P/Lt. Ronald Bautista, kasama ang Detective Management Unit (DMU), 5th MFC, RMFB, NCRPO, at Warrant PNCO ng Mandaon MPS, Masbate PPO ng joint manhunt operation na nagresulta sa pagkakaaresto sa akusado sa kanyang tinutuluyang bahay sa Brgy. Malinta, dakong 12:30 ng hapon.
Ani Lt. Bautista, dinakip nila ang akusado sa bisa ng warrant of arrest na inisyu ni Presiding Judge Mary Flor D. Tabigue-Logarta ng Regional Trial Court Branch 44, Masbate City, Masbate noong September 16, 2021, para sa kasong Murder. (Richard Mesa)