Taxi driver na wanted tangkang pagpatay sa Valenzuela, timbog

HIMAS-REHAS ang isang taxi driver na wanted sa kasong tangkang pagpatay matapos makorner ng pulisya sa manhunt operation sa Valenzuela City. Ipinag-utos ni Valenzuela police chief P/Col. Nixon Cayaban sa kanyang mga tauhan ang pagtugis sa akusado na si alyas “Arman”, 47, ng Quezon City na kabilang sa Top 10 Most Wanted Person ng lungsod. Sa ikinasang operation ng mga operatiba ng Warrant and Subpoena Section (WSS), nasukol nila si alyas Arman sa Tadeo Compound, Brgy. Karuhatan. Ani Col. Cayaban, hindi naman pumalag ang akusado nang bitbitin siya sa bisa ng warrant of arrest para sa kasong Attempted Murder na inisyu ng Valenzuela City Regional Trial Court Branch 283, noong July 9, 2024, na may inirekomendang piyansa na P120,000.00. Pansamantalang nakapiit ang akusado sa custodial facility unit ng Valenzuela CPS habang hinihintay ang pagpapalabas ng commitment order mula sa korte. Pinuri naman ni P/BGen. Josefino Ligan, District Director ng Northern Police District, ang mga tauhan ng Valenzuela Police sa kanilang hindi natitinag na pangako sa pagpapatupad ng batas kung saan muli niyang pinagtibay ang dedikasyon ng NPD sa walang tigil na operasyon laban sa mga wanted kriminal. (Richard Mesa)

https://peoples-balita.com/wp-content/uploads/2025/04/849530757f2fef34e49a8b3df03c10fb35b6d011f5cbfad318f0e03ff7e9bec4.avif