TANGGAPAN NG IMMIGRATION SA INTRAMUROS, SARADO NG LUNES AT MARTES

SARADO ang punong tanggapan ng Bureau of Immigration (BI) sa Intramuros Manila kahapon (Lunes) at ngayon (Martes) upang bigyang daan ang pagdi-disinfect sa buong gusali kasunod ng biglaang pagtaas ng  kaso ng Covid 19 sa Metro Manila.

Sa kanilang advisory, sinabi ni Immigration Commissioner Jaime Morente na ang lahat ng transaksiyon sa kanilang tanggapan ay pansamantalang suspendido sa loob ng dalawang araw kung saan ipinag-utos nito ang “thorough sanitation and disinfection”.

Sinabihan din ang lahat ng mga opisyal at mga empleyado na manatili sa loob ng kanilang bahay, bagama’t isang skeletal force ng kanilang mga personnel particular sa mga nagtratabaho sa support services at kanilang security.

Dagdag pa ni Morente na maaari silang pumunta sa kanilang mga tanggapan sa iba’t ibang lugar sa Metro Manila kabilang ang BI SM North Satellite Office at BI SM Aura Satellite Office at iba pa.

Sa mga may online appointment nitong Lunes at Martes ay maaari nilang ipa-reschedule ang kanilang appointments pag nagbukas ang kanilang tanggapan sa Miyerkules o i-check sa kanilang website sa www.immigration.gov.ph  at mga social media accounts para sa iab pang anunsiyo at advisory. (GENE ADSUARA)