Suporta ng gobyerno sa mga atleta, triple na-PBBM

TINIYAK ni Pangulong Ferdinand R. Marcos Jr. na hindi lamang dinoble kundi triniple na ng kanyang administrasyon ang suporta sa mga atleta at sa larangan ng sports sa bansa.

Ito ang inihayag ng Pangulo sa kanyang ikalimang State of the Nation Address (SONA).

“Mahalaga rin sa atin ang sports. Itinaas natin nang triple ang suporta natin dito. Hindi lang sa aliw na hatid nito, kundi para sa kalusugan,” pagtitiyak ng Pangulo.

Binigyang-diin din ni Pangulong Marcos ang patuloy na pag-angat ng Philippine sports, kasunod ng mga tagumpay ng WTA-highest-ranked Filipino tennis player na si Alex Eala.

“Sa nag-uumapaw nating suporta kay Alex Eala, sana ay marami ang naengganyo para matuto at maglaro hindi lamang ng tennis kundi ng iba pang sports,” diin ng Pangulo.

Umaasa rin ang Pangulo na lalo pang sisikat ang football sa bansa kasunod ng tagumpay ng Filipinas women’s football team.

“Sa halimbawa ng Filipinas women’s football team, sana rin ay mas sumikat pa ang football sa ating bansa at marami ang maglaro,” pahayag ng Pangulo.

Ipinahayag din ni Pangulong Marcos ang kanyang hangarin na balang araw ay makapasok ang Pilipinas sa FIFA World Cup.

“Balang-araw, baka makasali na ang Pilipinas sa World Cup,” dagdag pa ng Pangulo. (DARIS JOSE)