Sotto patuloy ang paglaki

Mas lalo pang tumangkad si Kai Sotto na magi­ging malaking tulong sa nakatakdang pagsabak nito sa NBA G League na lalarga sa susunod na buwan sa Orlando, Florida.

Isang pulgada pa ang itinangkad ni Sotto na mayroon nang 7-foot-3 sa huling update ng kanyang height na ipinost nito sa kanyang social media account.

Bukod pa rito, mayroon na ring 7-foot-5 na wingspan ang dating UAAP Juniors MVP.

“Height 7’3. Wingspan 7’5. Continue to watch me work,” ani Sotto sa kanyang post sa Twitter.

Malaki ang posibilidad na madagdagan pa ito sa mga susunod na taon lalo pa’t 18-anyos pa lamang ang dating Ateneo de Manila High School standout.

Kasalukuyang nagsasanay ang Ignite sa Walnut Creek, California para paghandaan ang pagbubukas ng NBA G League season sa susunod na buwan sa isang bubble setup sa Orlando, Florida.

Puspusan ang paghahanda ni Sotto para sa G League dahil ito ang magsisilbing tungtungan nito sa kanyang pangarap na makapasok sa NBA.