SLP tutuklas ng bagong talento sa Pilipinas

HAHANAP ang Swim League Philippines (SLP) ng mga bagitong tankers sa iba’t ibang panig ng Pilipinas sa pagdaraos nito ng 2022 Finis Short Course Swim Competition Series.

Unang aarangkada ang Luzon Leg na idaraos sa Marso 26 hanggang 27 sa New Clark City Swimming Pool sa Capas, Tarlac upang mabigyan ng tsansa ang mga nasa rehiyon para magpasiklab.

Darayo rin ang national series sa Visayas para naman sa second leg ng torneo na gaganapin sa Abril 23 hanggang 24 habang aariba din ang Mindanao Leg sa Mayo 28 hanggang 29.

Gaganapin naman ang National Finals sa Hunyo 4 hanggang 5.

Ang torneo ang magsisilbing qualifying para sa international competitions na lalahukan ng SLP sa Japan, Australia, France, US, Canada, Singapore, Thailand at Hong Kong.

“This event is open to all young and aspiring swimmers who want to be part of the SLP team competing in different international tournaments. We are looking forward to discovering more fresh talents,” ani SLP chairman at Behrouz Elite Swimming Team (BEST) team manager Joan Mojdeh.

Paglalabanan ang medalya sa walong ka­tegorya 6-under, 7 to 8 years old, 9 to 10 years old, 11 to 12 years old, 13 to 14 years old, 15 to 16 years old, 17 to 18 years old at ang 19-above.