SINING AT KULTURANG PILIPINO SA QUEZON CITY, BUHAY AT AKTIBO

IDINAOS kamakailan sa lungsod Quezon ang isang tagisan ng galing sa balagtasan na may temang Diwang, Sagisag Kultura ng Filipinas sa pangunguna ng National Commission on Culture and the Arts (NCCA), NCCA-Philippine Cultural Education Program katuwang ang QC Education Affairs Unit.

Sa kanyang talumpati, hinikayat ni Mayor Joy Belmonte ang sama-samang pagbibigay-buhay at pagkilala sa kultura at panitikang Pilipino. Dahil aniya, ang ating sining at kultura ay ang ating pagkakakilanlan saan mang panig ng mundo tayo makarating.

Dadag pa ng Alkalde, hindi biro ang naging sakripisyo ng taong nagsulong at patuloy na nagsusulong na manatiling buhay sa ating lahat ang sarili nating kultura at sining.

Ang Pambansang Alagad ng Sining sa Panitikan na si Virgilio Almario ay naging hurado sa naturang kumpetisyon. Nakiisa naman sina PCEP Director Joseph Cristobal at Asian Social Institute President Felipe de Leon Jr. sa aktibidad.

Matatandaan na tuwing ika-22 ng Nobyembre, ipinagdiriwang ang Poetry Day sa QC sa bisa ng Executive Order No.19. At ang Araw ng Pagtula sa QC kasabay ng kapanganakan ng makata na si Jose Corazon de Jesus o Huseng Batute. (PAUL JOHN REYES)