Sinas, handang patunayan na karapat-dapat siya sa posisyong ibinigay sa kanya ng Pangulong Duterte

HANDANG patunayan ni bagong Philippine National Police chief Major General Debold Sinas na karapat-dapat siyang maging pinuno ng PNP.

Ito’y sa kabila ng kaliwa’t kanang kritisismo sa kanyang pagkakatalaga bilang pinuno ng Pambansang pulisya.

Sinabi ni Sinas sa Laging Handa press briefing na marami na siyang napagdaanang posisyon bago marating ang pinaka mataas na puwesto sa PNP.

Sa katunayan, kabilang na rito ang pagiging hepe ng Central Visayas police office, naging Deputy Regional Director for Administration din siya sa Police Regional Office 12, nagsilbing secretary to the Directorial Staff sa Camp Crame, direktor ng PNP Crime Laboratory at naging Police Chief Superintendent noong 2017.

Aniya, kahit hindi kumpiyansa ang karamihan sa kanyang liderato ay wala na siyang magagawa hinggil dito dahil mismong si Pangulong Rodrigo Duterte ang pumili sa kanya.

Binigyang-diin nito na patutunayan na lamang niya na karapat dapat siya na maging PNP Chief at tiniyak na ipatutupad ang direktiba sa kanya ni Pangulong Duterte kabilang ang pagsugpo sa ilegal na droga, sa koraspyon at sa terorismo. (Daris Jose)