Shootout: 2 drug suspect utas, P68 milyong shabu nasamsam

Patay ang dalawang pinaniniwalaang miyembro ng “Divinagracia drug syndicate”matapos manlaban sa mga tauhan ng Philippine Drug Enforcement Group (PDEG) at National Capital Regional Drug Enforcement Unit sa Muntinlupa City, kamakalawa ng  gabi.

Kinilala nina PNP chief,  General Guillermo Eleazar  ang mga napaslang na sina Jordan Abrigo, alyas Jordan  at Jayvee De Guzman o JB, na target sa isinagawang operasyon.

Nasamsam sa mga ito ang tatlong Chinese tea bags na naglalaman ng tinatayang 10 kilo ng hinihinalang shabu na nagkakahalaga sa kabuuang P68 milyon, isang Nissan Cefiro na kulay itim, marked money na ginamit sa buy-bust at ang dalawang kalibre 45 baril .

Dead-on-the-spot ang mga suspek nang makipagpalitan ng putok habang nagtatangkang tumakas nang makatunog na pulis ang kanilang ka-transaksyon.

Ayon sa ulat ni PDEG director, Brig. Gen. Remus Medina, wala namang nasugatan sa mga operatiba.

Ang grupo umano ay may source ng ilegal na droga na isang alyas Jhonson, isang Chinese national na nakapiit sa New Bilibid Prison.

Supplier din umano ang mga suspek ng droga sa NCR at Region 6 at iba pang kalapit na lalawigan, sa Visayas at sa Mindanao.