Senglot na sekyu, shoot sa huyo

NAGPULASAN sa takot ang mga tao sa harap ng isang sikat na coffee house nang magwasiwas ng hawak na baril ang isang senglot na sekyu sa Caloocan City.

          Sa ulat, nagpapatrulya ang mga tauhan ni Northern Police District (NPD) Director P/BGen. Josefino Ligan sa kahabaan ng EDSA, Brgy. 86, nang isang rider ang lumapit sa kanila para isumbong ang isang lalaki na nagwawasiwas ng hawak niyang baril.

          Inabutan ng rumespondeng mga tauhan ng District Tourist Police Unit (DTPU) sa harap ng Starbucks ang lalaki subalit, nang mapansin nito ang presensya ng mga pulis ay kaagad isinilid sa dala niyang sling bag ang hawak na baril.

          Gayunman, hindi na nakapalag ang 27-anyos na si alyas “Tikboy” nang arestuhin siya ng mga tauhan ni Gen. Ligan at nakumpiska sa kanya ang isang hindi lisensiyadong kalibre .38 revolver na kargado ng mga bala, holster, brown na sling bag, at security guard ID.

Ayon kay NPD Public Information Office (PIO) head Lt. Marcelina Pino, kasong Alarm and Scandal, paglabag sa Comprehensive Firearms and Ammunition Regulation Act at B.P. 881 o Election Gun Ban laban ang isinampa ng pulisya laban sa suspek sa Caloocn City Prosecutor’s Office. (Richard Mesa)