Saludar vs Paradero sa titulo

PAGRARAMBULAN nina dating World Boxing Organization (WBO) minimumweight champion Vic Saludar at wala pang talong Robert Paradero ang bakanteng World Boxing Association (WBA) minimumweight title sa Sabado, Pebrero 20 sa pinagpipilian pang lugar – Elorde Sports Center sa Parañaque City o Alonte Sports Arena sa Biñan City.

Parehong hindi lumaban sa buong taong 2020 ang dalawang boksingero dahil sa Covid-19 na sumuspinde ng lahat ng sports event sa bansa sapul noong Marso dahil sa pinairal na lockdown ng pamahalaan.

Huling nakipagbanatan si Saludar, 30, sa demolisyon kay Mike Kinaandaman via sixth round knockout win noong 2019 sa Naga City.

Galing naman si Paradero, 24 sa first round KO victory kontra Jonathan Almacen sa Malaybalay City sa kaparehas na taong nabanggit. (REC)