QC LGU, nagpaalala na mag-ingat sa MPOX , 2nd at 3rd case naitala sa lungsod
- Published on September 10, 2024
- by @peoplesbalita
PINAALALAHANAN ng lokal na pamahalaan ng Quezon City ang mga mamamayan na mag-ingat laban sa monkey pox o mpox matapos maitala ang ikalawa at ikatlong kaso nito sa lungsod.
Ayon sa kalatas na inilabas ng City Epidemiology and Surveillance Division (QCESD), kasalukuyan nang naka-isolate ang mga pasyente sa kani-kanilang mga bahay.
Sa pahayag ni Quezon City Mayor Joy Belmonte, hindi biro ang mpox malala ang epekto nito lalo na sa mga taong mahina ang immune system kaya napakahalaga na tayo mismo ay mag-ingat para hindi makakuha ng virus at hindi tayo makahawa pa.
Paalala pa ng alkalde, ugaliin pa rin ang paghuhugas ng kamay at lumayo sa mga taong nagpapakita ng sintomas ng mpox.
Dagdag pa ni Belmonte, kung may sintomas kayo ng mpox agad nang pumunta sa pinakamalapit na health center o ospital para magpatingin.
Pagtitiyak pa ng punong-lungsod, hindi papabayaan at handang tumulong ang lokal na pamahalaan para sa kanilang mabilis na pagpapagaling.
Inilahad pa ni Belmonte na agad na nagsagawa ng contact tracing ang QCESD at mahigpit na minomonitor ang mga nakasalamuha ng dalawang pasyente.
Matatandaang dalawang linggo na ang nakalilipas nang iulat ng lokal na pamahalaan ang unang kaso ng Mpox na kasalukuyang naka home quarantine at nagpapagaling.
Nagtatag na rin ng Task Force ang lungsod na pinamumunuan din ni Belmonte sa bisa ng Executive Order 14 series 2024 upang mapatatag at mas maging episyente ang pagtugon sa kaso ng mpox. (PAUL JOHN REYES)