PNP Chief Carlos, ‘di kailangang mag-leave – DILG

INIHAYAG ni Department of the Interior and Local Government (DILG) Secretary Eduardo Año na hindi kailangan ni PNP Chief, PBGen. Dionardo Carlos na mag-leave o magbakasyon, sa gitna ng isinasagawang imbestigasyon sa pagbagsak ng isang police helicopter sa Real, Quezon kamakailan.

Kasunod ito ng ulat na susunduin sana ng natu­rang helicopter si Carlos at ang kanyang pamilya sa isang exclusive island resort sa Balesin noong Lunes ng umaga.

“He is still the chief PNP and it’s rightful for him to use the PNP chopper to be able to attend a forthcoming official duty when there are no other available means,” pahayag ni Año.

Wala umanong anumang pananagutan si Carlos sa pangyayari at tiniyak na ang imbestigasyon ay magpopokus sa naging sanhi ng aksidente.

Matatandaang noong Lunes ay bumagsak ang isang police helicopter sa Real, Quezon na nagresulta sa pagkamatay ng enlisted crew member na si Pat. Allen Noel Ona, at pagkasugat ng mga pilotong sina PLtCol. Dexter Vitug at PLtCol. Michael Melloria, na nilalapatan pa ng lunas sa ngayon.

Bumuo na ang PNP ng Special Investigative Task Group (SITG) na mag-iimbestiga sa insidente.

Tiniyak din ni Fajardo na sasagutin ni Carlos ang lahat ng medical expenses ng mga nasugatang pulis at pagkakalooban din sila ng tulong pinansiyal, partikular na ang pulis na namatay sa aksidente.