Pinangunahan ni PBBM: KADIWA ng Pangulo, inilunsad na sa Cebu City

OPISYAL nang inilunsad sa pangunguna  ni Pangulong Ferdinand R. Marcos ang “KADIWA ng Pangulo” sa Cebu City na layuning maipagpatuloy ang pagbibigay ng murang bilihin sa mga mamimili.

Sa naging talumpati ng Pangulo,  sinabi  nitong naging popular ang Kadiwa ng Pasko at hinahanap aniya ito ng mga tao kaya’t minarapat nilang ipagpatuloy ang programa na ngayo’y tinawag ng KADIWA ng Pangulo.

Maliban aniya sa pagma-market ng agricultural  products sa KADIWA ng Pangulo ay mabibigyan din ng pagkakataon ang mga MSMEs para mai-market ang kanilang mga produkto.

Sa naturang aktibidad ay ibinalita rin ni Pangulong Marcos ang paglulunsad ng KADIWA para sa mga manggagawa.

Ito aniya  ay pagsasanib-puwersa ng Department of Labor and Employment , DTI at Department of Agriculture sa gitna na rin ng target nilang lalo pang paramihin ang Kadiwa na ngayon ay nasa 500 na. (Daris Jose)