Pedicab driver nalambat sa Navotas, P380K shabu, nasamsam
- Published on April 10, 2023
- by @peoplesbalita
NASAMSAM sa isang pedicab driver na sangkot sa pagtutulak ng ilegal na droga ang halos P.4 milyon halaga ng shabu matapos matimbog aa buy bust operation sa Navotas City.Kinilala ni Navotas police chief P/Col. Allan Umipig ang naarestong suspek na si Jayson Gacayan, 42 ng Leongson St., Brgy. San Roque.
Sa kanyang ulat kay Northern Police District (NPD) PBGen Ponce Rogelio Penones Jr, sinabi ni Col. Umipig na dakong alas-12:17 ng hating gabi nang magsagawa ang mga operatiba ng Station Drug Enforcement Unit (SDEU) sa pangunguna ni PCpt Luis Rufo Jr, ng buy bust operation sa Little Samar St., Brgy. San Jose.
Isang undercover police ang nagawang makipagtransaksyon sa suspek ng P12,000 halaga ng shabu at nang tanggapin nito ang marked money mula sa poseur buyer ay agad siyang sinunggaban ng mga operatiba.
Nakumpiska sa suspek ang aabot 56 grams ng hinihinalang shabu na may standard drug price Php 380,800.00, buy bust money na isang tunay na P1,000 bill at 11-pirasong P1,000 boodle money at P670 recovered money.
Pinuri naman ni BGen Penones ang Navotas police sa pamumuno ni Col. Umipig sa kanilang masigasig kampanya kontra ilegal drogra na nagresulta sa pagkakaaresto sa suspek na nahaharap sa kasong paglabag sa RA 9165 o ang Comprehensive Dangerous Drug Act of 2002. (Richard Mesa)