Pedicab driver, kulong sa tangkang pagdukot sa 2 batang estuyante sa Caloocan

KULUNGAN ang bagsak ng isang pedicab drivert nang tangkain dukutin ang dalawang batang estudyante sa harap ng kanilang paaralan sa Caloocan City, Martes ng umaga.

          Ayon kay Caloocan police chief P/Col. Edcille Canals, mahaharap sa kasong Attempted Kidnapping ang suspek na si alyas “Danilo”, 49, at residente ng San Andres, Manila.

          Sa inisyal na ulat ni PCpl Esteephanie Pascua kay Col. Canals, nangyari ang insidente dakong alas-11:45 ng tanghali sa harap ng Maypajo Elementary School, sa J.P Rizal St., Brgy., 35, Maypajo, matapos sunggaban at pilit umanong isinasama ng suspek ang 10-anyos na lalaking estudyante habang papasok sa paaralan subalit, nanlaban ang biktima bago tumakbo.

          Kasunod nito, tinangka ring sunggaban ng suspek ang 9-anyos na babaeng estudyante at nang makita ng Barangay Tanod na si Bernie Nacubuan ang pangyayari ay sinita niya ito kaya nakawala ang biktima saka humingi ng tulong sa tanod at sinabing hindi niya ama ang lalaki.

          Agad siniguro ng tanod ang kaligtasan ng biktima habang pinagtulungan namang kulatahin ng galit na mga taumbayan ang suspek na natigil lang nang pumagitna ang barangay tanod na umaresto sa kanya.

          Pinasalamatan ni Mayor Along Malapitan ang Tanod na si Nacubuan ng Brgy. 35 sa kanyang masigasig na pagbabantay at maagap na pagtugon sa insidente.

“Bagama’t ikinalulungkot po natin ang nangyaring insidente, patunay po ito na handa ang barangay at kapulisan na tumugon sa mga ganitong pangyayari,” pahayag niya.

“Inuulit ko ang direktiba ko sa binuo nating Aksyon at Malasakit Task Force, lalo na sa kapulisan, na paigtingin ang pagbabantay sa mga paaralan lalo na tuwing oras na papasok at lalabas ang mga mag-aaral,’ dagdag niya. (Richard Mesa)