PCO Usec Castro mananatili sa puwesto- Malakanyang

MANANATILI sa puwesto si Presidential Communications Office (PCO) Undersecretary at Palace Press Officer Claire Castro.

Ito ang kinumpirma mismo ni Communications Office (PCO) acting Secretary Dave Gomez matapos siyang magpalabas ng Special Order No. 25-174, kumpirmasyon ng pagkakatalaga kay Castro, ‘effective immediately’. Ang nasabing special order ay may lagda ni Gomez at may petsang Hulyo 29, 2025.

Nakasaad sa special order na trabaho ni Castro ang pangunahan ang koordinasyon at paghahatid ng official press briefings at media engagements sa ngalan ng Office of the President (OP) at PCO.

Kasama rin sa kanyang mga responsibilidad ang “opisyal na magsalita at i-brief ang media sa kanyang kapasidad bilang Palace Press Officer; magbigay ng napapanahong kalatas at paglilinaw sa Presidential engagements, polisiya at posisyon, bilang isang awtorisado; pangunahan ang koordinasyon sa Media Accreditation and Relations Office (MARO), Presidential News Desk (PND) at iba pang kaugnay na units bilang suporta sa press relations at media operations; pangasiwaan ang paghahanda ng messaging materials at briefing content para sa official media engagements; gampanan ang iba pang kaugnay na tungkulin gaya ng maaaring iatas ng Kalihim at iyong nasa Office of the President, paminsan-minsan.

Direkta namang magre-report si Castro sa Kalihim ng PCO para sa ‘policy guidance, strategic direction at official issuances.’

‘This confimation shall not entail the creation of a new plantilla item or result in additional compensation beyond those authorized by applicable laws and regulations,” ang nakasaad sa special order.

Matatandaang, dalawang linggo na ang nakalilipas nagpalabas ng mmemorandum si Gomez ng memorandum na nag-aatas sa lahat ng Undersecretaries, Assistant secretaries, at heads of agencies sa ilalim ng PCO na magsumite kanilang ng unqualified courtesy resignation.

Ayon sa memorandum, layon nitong bigyang-laya si Gomez sa pagtupad ng kanyang mandato bilang pinuno ng ahensya.

Nakasaad din sa memo na hanggat wala pang desisyon sa kanilang courtesy resignation, magpapatuloy pa rin ang kanilang trabaho sa kasalukuyan, maliban na lamang kung magkaroon ng anumang pagbabago depende sa magiging desisyon ng Kalihim.

Ang hakbang na ito ay bahagi ng isinasagawang performance audit ni Gomez upang mas mapahusay ang operasyon ng ahensya. (Daris Jose)