PCO at print media publishers, lumagda ng MOU para labanan ang ‘fake news’

LUMAGDA ang Presidential Communications Office (PCO) at mga print media publishers, araw ng Miyerkules, Marso 4, ng isang memorandum of understanding (MOU) para sa “Oplan Kontra Fake News,”.
Isa itong inisyatiba na naglalayong pagtibayin ang transparency at labanan ang disinformation sa bansa.
Pinangunahan ni PCO Secretary Dave Gomez ang pagpirma sa MOU sa Kalayaan Hall, Palasyo ng Malakanyang.
Sa naging talumpati ni Gomez, sinabi nito na ang “Oplan Kontra Fake News” ay makabuluhan, binigyang diin na ang ‘misinformation at disinformation’ lalo na sa social media, ay katulad ng isang “venom that poisons the hearts and minds of the people.”
Ayon pa rin kay Gomez, ang fake news ay patuloy na kumakalat lalo na sa social media kung saan marami ang naniniwala dito at naloloko.
Samantala, ang mga newspaper publishers at/o pangulo na nakiisa sa MOU signing ay sina:
Paolo Prieto of the INQUIRER
Herminio Coloma, Jr. of Manila Bulletin
Teresa “Tammy” Mendoza of Philippine Star
Arjay Balinbin of Business World
Luisito “Chito” Lozada of Daily Tribune
T. Anthony Cabangon of Business Mirror
Rolando Estabillo of Manila Standard
Allen Macasaet of Malaya Business Insight
Anna Marie Ang-Thompson of Manila Times
Ayon kay Prieto, ang inisyatiba ay “timely and necessary move,” lalo pa’t natuklasan sa kamakailan lamang na survey na kinokonsidera ng mayorya ng mga pinoy na seryosong problema ang ‘fake news’ subalit mahirap na mauri mula sa tamang impormasyon.
“As organizations endowed with a mission to provide accurate information, we must not stand idly by as fake news peddlers seek to poison minds and hearts of our people and wreak havoc on our nation,” ang sinabi ni Prieto.
“Individually and collectively, we should persist in providing verified information and fight fake news with truthful accounts whenever and wherever we find them,” aniya pa rin. (Daris Jose)