PBBM, pinaiigting ang mga hakbang para mapanatiling kontrolado ang presyo ng bilihin

PINAIIGTING ng pamahalaan ang mga hakbang upang mapanatiling kontrolado ang presyo ng mga pangunahing bilihin habang patuloy na nanganganib ang pandaigdigang suplay ng langis.

Sa isang Kapihan forum kasunod ng 18th BRICS Summit sa New Delhi, India, sinabi nI Pangulong Ferdinand Marcos Jr., na nananatiling prayoridad ng pamahalaan ang pagpapanatiling abot-kaya ng presyo ng mga bilihin at pagtugon sa inflation.

“The real problem that’s driving all of this is inflation,” ayon sa Pangulo sabay sabing “Food follows fuel.”

Nabanggit ng Pangulong Marcos na nananatili sa pagitan ng dalawang porsiyento at tatlong porsiyento ang core inflation, na hindi kabilang ang pagkain at langis, habang patuloy na nakaaapekto sa pangkalahatang inflation ang presyo ng pagkain at langis.

Kabilang sa mga binanggit ng Pangulo na nagdudulot ng kawalan ng katiyakan sa pandaigdigang suplay ng langis ang pagsasara ng Strait of Hormuz, mga pag-atake sa imprastraktura ng langis at tumitinding tensyon sa Red Sea.

Sinabi ni Pangulong Marcos na patuloy na tumutugon ang pamahalaan sa mga panlabas na pressure upang mapagaan ang epekto nito sa presyo ng mga bilihin.

“We’re trying to do everything that we can to keep prices down,” ang pahayag ng Pangulo. 

(DARIS JOSE)