PBBM, inulit ang pagsusulong para sa ratipikasyon ng RCEP

MULING inulit ni Pangulong  Ferdinand  Marcos Jr., sa Philippine Business Opportunities Forum sa Japan ang  ginagawang pagsusulong ng kanyang administrasyon para sa ratipikasyon ng Regional Comprehensive Economic Partnership (RCEP) mega free trade deal,  kung saan ‘signatory’ ang Pilipinas.

Kamakailan, sinabi ng Presidential Communications Office (PCO)  sa ipinalabas nitong kalatas na itinutulak ng Pangulo ang ratipikasyon para sa free trade agreement.

Unang lumutang noong Agosto 2012, ang RCEP ay kinabibilangan ng 10 miyembro ng Association of Southeast Asian Nations (ASEAN), kasama ang China, Japan, South Korea, Australia, at New Zealand.

Inaprubahan ito ng nakalipas na administrasyon noong Setyembre ng nakaraang taon at dinala sa Senado para sa ‘concurrence.’

Bago pa umupo sa puwesto, nagpahayag na ang Chief Executive ng kanyang reserbasyon ukol sa RCEP, sabay sabing nais niyang makita kung paano ito makaaapekto sa sektor ng agrikultura.

Gayunman, sinabi pa rin ni Pangulong Marcos na isinusulong ng kanyang administrasyon ang Congressional ratification,  “which I am promised will be coming soon – of the Philippines’ participation in the Regional Comprehensive Economic Partnership, or RCEP.”

Nauna rito, nakikita naman  ni Senate President Juan Miguel Zubiri na magagawang i-ratify ng Senado ang Regional Comprehensive Economic Partnerships o RCEP free trade agreement sa loob ng unang quarter ng taon.

Prayoridad aniya kasi ng Senado ang ratipikasyon ng RCEP at sa katunayan ay magkakaroon na ng pagdinig patungkol rito na itinakda sa Pebrero 7.

“This free-trade agreement among Southeast Asian economies, plus Japan, China, South Korea, Australia, and New Zealand, will result in greater market access for 92% of products from the Philippines,” ang wika pa rin ng Pangulo.

Sa isinagawang  panel session, sinabi naman ni Trade Secretary Alfredo Pascual na  “many prospective foreign investors… who would want to access ASEAN and the East Asian market said they would consider the Philippines if we were part of RCEP.”

Aniya pa, “the Philippines risked being bypassed in favor of other ASEAN countries that have access or ratified their accession to RCEP.”

Inaasahan naman ng Department of Trade and Industry (DTI) na makalilikha ang  RCEP ng 10.47% na dagdag sa exports ng bansa  at  2.02% dagdag sa real gross domestic product.

Kinakatawan naman ng RCEP ang  50% ng global manufacturing output; 50% ng global automotive output; 70% ng electronics; 26% ng  global value chain (GVC) trade volume; 60% GVC para sa  electrical/machinery, petroleum/chemicals, textiles/apparel, metal, at transport equipment, 35% ng kontribusyon sa global exports ng electronics at machineries; at ang pangunahing  GVC hubs ng big economies gaya ng South Korea, Japan, at China. (Daris Jose)