PBBM, ikinatuwa ang naging pasiya ng MANIBELA at PISTON na tapusin na ang kanilang tigil- pasada

LABIS  na ikinatuwa ni Pangulong Ferdinand Marcos Jr., ang naging desisyon ng dalawang transport groups na itigil na ang kanilang ikinasang tigil-pasada at  hindi na  paaabutin pa ito ng isang linggo.

Sa ipinalabas na kalatas ng Presidential Communications Office (PCO), sinabi nitong masaya ang gobyerno sa naging pasiyang MANIBELA at PISTON kasunod ng ginanap na pagpupulong sa Palasyo ng Malakanyang.

Magkakaharap sa nasabing pulong sina PCO Secretary  Cheloy Garafil,  Undersecretary Roy Cervantes ng Office of the Executive Secretary. PISTON President Mody Florada at Manibela Transport Group Chairman Mar Valbuena.

Sinabi ng PCO, binigyan ng direktiba ni Pangulong Ferdinand R Marcos Jr ang DOTr at LTFRB  na pag- aralan ang mga probisyon ng Department Order No. 2017-011 o ang Omnibus Franchising Guidelines.

Ito ay  para masiguro na maisaalang-alang ang bawat aspeto sa  pagpapatupad ng jeepney modernization habang gusto rin naman aniya ng Chief Executive na  mapakinggan ang mga hinaing ng mga driver at operator.

Bukod Dito ay inatasan din ng Punong Ehekutibo ang  DOTr at ang LTFRB ng  magsagawa ng malalim at malawakang konsultasyon para sa implementasyon ng Public utility modernization program na dito ay dapat aniyang pare- parehong makabenepisyo ang mga driver, operator lalong lalo na ang  mga mananakay.

“Sa huli, iisa lamang ang layunin ng gobyerno at ng ating sektor ng pampublikong transportasyon—ang magbigay ng maayos, maginhawa, ligtas, at episyenteng serbisyo sa bawat pasahero,” ayon kay Garafil. (Daris Jose)