PBBM, hinikayat ang LGUs na maglaan ng 50% ng support fund para sa libreng bigas

HINIKAYAT ni Pangulong Ferdinand R. Marcos Jr. ang local government units (LGUs) na simulan na ng pamamahagi ng libreng bigas sa kanilang mga constituents sa loob ng susunod na isa hanggang dalawang linggo. Bahagi ito ng pagsisikap na mapagaan ang paghihirap at pasanin ng mga sambahayan sa gitna ng tensyon sa Gitnang Silangan.
Sa katunayan, inatasan ni Pangulong Marcos ang LGUs na maglaan ng 50% ng kanilang Local Government Support Fund (LGSF) na pambili ng bigas para ipamahagi.
“Magsisimula na rin na magbigay ang ating mga LGU ng libreng bigas. Ito ay nagsimula –‘yung LGSF program ito – nagsimula ito bago pa nagkagiyera. Pero iro-roll out ito within the next week or two,” ang sinabi ni Pangulong Marcos.
Ang LGSF ay isang government program na nagbibigay ng direktang financial assistance sa LGUs para sa mga priority projects, kabilang na ang infrastructure, healthcare, at iba pang local services.
Sa kabilang dako, sinabi ni Pangulong Marcos na pangungunahan ng LGUs ang pagpapatupad ng inisyatiba, na may opsyon na maglaan ng hanggang 100% ng kanilang LGSF funds para sa rice distribution.
Samantala, tiniyak naman ni Pangulong Marcos sa publiko na walang agarang pagtataas sa presyo ng mga pangunahing bilihin sa kabila ng tumataas na global fuel costs.
Ani Pangulong Marcos, nangako sa kanya ang manufacturers na pananatilihin ng mga ito na matatag ang presyo sa ngayon, dahil nananatiling ibinebenta ng mga ito ang ‘inventory purchased’ bago pa tumaas ang tensyon sa Gitnang Silangan.
“Habang nandiyan ang kanilang imbentaryo, nangako sila na hindi nila itataas ang presyo ng mga primary commodities,” ang winika ni Pangulong Marcos. ( Daris Jose)