Parking boy, binayaran ng saksak

SAKSAK sa katawan ang ibinayad ng isang balasubas na lalaki sa parking attendant na kanyang inutangan matapos siyang singilin ng biktima sa Malabon City, kahapon ng madaling araw.

Isinugod sa Tondo Medical Center ang biktimang si Arjay Cablaida, 19 ng 113 Brgy. Tanong para magamot ang malalim na saksak mula sa suspek na nakilala lamang sa alyas “Aries”, walang hanapbuhay at residente ng Bagong Silangan St. Brgy. San Jose, Navotas City na hinahanting na ngayon ng pulisya.

Sa ulat na ipinadala ni P/MSgt. Julius Mabasa kay Malabon police chief P/Col. Jessie Tamayao, dakong ala-1 ng madaling araw nang dumating ang suspek sa Estrella Street, Brgy. Tañong kung saan nagta-trabaho bilang parking attendant ang biktima.

Tinawag ni Aries ang biktima at sa pag-aakalang babayaran na siya ng suspek sa halagang P50.00 lumapit siya at tinanong kung babayaran na ang hiniram na salapi.

Nagalit umano ang suspek na posibleng napahiya sa mga nakarinig sa ginawang paniningil ng biktima kaya’t kaagad na nagbasag ng bote at inundayan ng saksak sa tiyan si Cablaida.

Sa kabila ng tama ng saksak, nakatakbo pa sa malapit na barangay hall si Cablaida upang humingi ng tulong na nagbunsod sa suspek na tumakas patungo sa hindi nabatid na direksiyon. (Richard Mesa)