Pagsulong ng VAT Exemption tuluy-tuloy upang makatulong sa bawat Pilipino

ITINUTULAK ni TALINO AT GALING PINOY (TGP) party-list Rep. Jose Teves Jr. ang pagpasa ng isang batas na mag-aalis sa pagpataw ng Value-Added Tax (VAT) sa mga lahat ng uri ng gamot, generic o branded man, upang makatulong na maibsan ang bawat Pilipino sa sobrang taas na halaga ng mga gamot.

Aniya, pangatlo ang Pilipinas na may pinakamahal na halaga ng gamot sa buong Asia.

Noong Agosto 2024, naglabas ang Bureau of Internal Revenue ng Memorandum Circular No. 93-2024 na nag-aalis ng VAT sa 15 klase ng gamot para sa cancer, high cholestrol, hypertension at mental illness.

Naghain ng House Bill No. 8565 si Teves upang isulong ang pagtanggal sa VAT ng lahat ng uri ng generic at branded na mga gamot.

“Nararapat lamang na katuwang tayo ng ating mga kababayan na labis na naghihikahos sa buhay na nabibilang sa poorest of the poor,” aniya.

Dagdag pa niya, patuloy niyang isusulong sa 20th Congress na maipasa ang panukalang maialis ang pagpataw ng VAT sa mga gamot.

Sa ginanap na KAPIHAN SA EUROTEL pulong balitaan sa pangunguna ni Dr. Danilo Mangahas ay inilahad ni Teves ang kanyang hangarin na masakop ng PhilHealth packages ang lahat ng uri ng karamdaman.

“The Philippine Health Insurance Corp. has so many billions of pesos which should be spent for all Filipinos, especially PhilHealth members,” diin niya.

Nais niya rin sana na masakop ng Medical Assistance for Indigent and Financially Incapacitated Patients Program (MAIFIPP) ng PhilHealth ang mga professional fees ng mga doktor upang maging zero-billing ang mga pasyenteng naa-admit sa mga ospital. (PAUL JOHN REYES)