Pagpalo sa 200% growth rate ng COVID-19 cases, pinagbatayan ng quarantine classification

ANG pagpalo sa 200% growth rate ng COVID-19 cases sa Metro Manila, ay kabilang sa dahilan kung bakit may ilang lugar ang isinailalim sa quarantine classification.

Sinabi ni presidential spokes- person Harry Roque na ang growth rate at average daily attack rate ay ang mga factors na kinunsidera ng pamahalaan para sa quarantine classifications.

“Kinukumpara ‘yung figures every two weeks. ‘Yung daily attack rate po, ilan ang nagkaroon per 100,000. At ‘yung growth rate, gaano kabilis nag-doble din ‘yung mga kaso,” ayon kay Sec. Roque.

“Mataas pa. Ibig sabihin po niyan, medyo ang ating (Metro Manila) growth rate ay nasa high,” dagdag na pahayag ni Sec. Roque.

Aniya, ang growth rate na pumalo sa mahigit 200% ay kinukunsiderang mataas; ang less than 200% ay “moderate,” habang ang 0% ay mababa.

Aniya, ang growth rate at average daily attack rate sa Metro Manila ay nasa moderate level.

Kagabi sa public address ng Pangulo ay inanunsyo nito na mananatili ang Metro Manila sa ilalim ng general community quarantine (GCQ).

Maliban sa MM, ang Batangas, Tacloban, Iloilo, Bacolod, at Iligan ay nasa ilalim din ng GCQ.

“Kung ang average daily attack rate ay less than 1 pero ang growth rate ay 200%, magiging GCQ ‘yan. Kung ang average daily attack rate ay less than 1 at nasa 0 to 200% ang growth rate, ‘yan ay MGCQ,” paliwanag ni Sec. Roque.

“Kung wala talagang kaso, ‘yan po ay minimal o ‘yung tinatawag na new normal,” aniya pa rin.

Samantala, hinikayat ng Metro Manila mayors at eksperto mula sa University of the Philippines- OCTA Research team ang ekstensyon ng GCQ sa buong capital region upang mapanatili ang positibong natamo ng pamahalaan laban sa COVID-19. (Daris Jose)