Pagdinig sa kaso ni FPRRD sa ICC hiling ng ilang mambabatas na bumalik ang Pilipinas sa hurisdiksyon nito

SA gitna ng pagdinig sa kaso ni dating pangulong Rodrigo Duterte sa International Criminal Court (ICC) sa The Hague, Netherlands, nais ng ilang mambabatas na bumalik ang Pilipinas sa hurisdiksyon nito.
Naghain ng House Resolution No. 811 sina Akbayan partylist Rep. Perci Cendaña at mga kapartidong Rep. Chel Diokno, Rep. Dadah Kiram Ismula at kasama si Dinagat Islands Rep. Kaka Bag-ao, na bumalik sa ratipiskasyon ng Rome Statute na nagtaguyod ng ICC.
Kasabay nito ang isinasagawang pagdinig sa confirmation-of-charges laban kay Duterte nitong Lunes sa salang crimes against humanity na nag ugat sa war on drugs ng nakaraang administrasyon.
“Kailangan nating ipakita na hindi kagaya ng dating administrasyon, sinusuportahan natin ang mga biktima ng tokhang at huwad na war on drugs ni Digong,” sinabi ni Cendaña.
Ayon kay Cendaña, ang pagbabalik ng Pilipinas sa hurisdiksyon ng ICC ay makabubuti upang maiwasan ang human rights abuses.
“We cannot allow the return to a tokhang presidency that will belittle human rights, murder children, torture, and dehumanize our people. Hindi dapat natin payagan na maulit itong bangungot ng pang-aabuso sa karapatang pantao sa ating bansa,” sinabi ni Cendaña.
(Vina de Guzman)