Pagbubukas ng klase tuloy kahit may monkeypox – DOH

WALA umanong dahilan para maantala ang pagbubukas ng klase sa Agosto 22 sa kabila ng pagkakadiskubre ng ­unang kaso ng monkeypox sa bansa dahil sa mga itinakdang “safeguards” ng pamahalaan, ayon kay Department of Health (DOH) officer-in-charge Maria Rosario Vergeire.

Sinabi ni Vergeire na katuwang ang Department of Education (DepEd) ay palalakasin nila ang screening sa mga mag-aaral at mga guro na magbabalik sa mga paaralan.

“Walang papasok dapat sa eskwela na may mga sintomas o ‘di kaya kung meron nang mga lesions, makita na natin agad,” paliwanag ni Vergeire.

Inihayag ito ni Vergeire makaraang sabihin ni DepEd spokesperson Michael Poa na babase sila sa panuntunan na ilalabas ng DOH kaugnay ng monkeypox virus.

Nadiskubre nitong Hulyo 28 ang unang kaso ng monkeypox sa bansa na isang 31-anyos na pasyente na galing sa ibang bansa at dumating ng Pilipinas nitong Hulyo 19.

Tinatayang nasa 13.1 milyong estudyante na naka-enroll ang inaasahan na magbabalik sa mga pampublikong paaralan sa Agosto 22 sa panunumbalik ng “in-person” na mga klase.  (Daris Jose)