Pacquiao bilib kay Marcial

Kabilang si eight-division world champion Manny Pacquiao sa mga nag-celebrate matapos umabante sa semifinals si Eumir Felix Marcial sa Tokyo Olympics.

Naitarak ni Marcial ang impresibong first-round knockout win kay Arman Darchinyan ng Armenia sa men’s middleweight quarterfinals kahapon sa Kokugikan Arena.

Ang panalo ang nagbigay katiyakan kay Marcial ng awtomatikong tansong medalya.

At naniniwala si Pacquiao na kayang-kaya ni Marcial na masungkit ang inaasam na gintong medalya.

“Looks like Eumir Marcial is ready for the gold rush. Congratulations on your first-round knockout victory into the medal round. #Olympics,” ayon sa post ni Pacquiao sa social media.

Si Marcial ay bahagi ng MP Promotions kung saan nagsanay ito sa Wild Card Gym sa Hollywood, California kasama sina Hall of Famer Freddie Roach at strength and conditioning expert Justine Fortune.

Dalawang panalo na lamang ang kailangan ni Marcial para maisakatuparan ang minimithing gintong medalya para sa Pilipinas.

Nauna nang ipinangako ni Marcial na ibubuhos nito ang lahat upang makamit ang pangarap na ginto.