Pabilisin ang national ID system, mandato ni PDu30

MANDATO talaga  ni Pangulong Rodrigo Roa Duterte ang pabilisin ang national ID system sa bansa.

Nais kasi ng Pangulo na tuluyan nang mawala ang panloloko at pandaraya ng ilang tiwaling opisyal makapagbulsa lamang ng pera mula sa kaban ng bayan.

“Dahil nakita natin na iyong pagdi-distribute ng ayuda ay hindi sana na-delay kung mayroon na tayong national ID system,” ayon kay Presidential spokesperson Harry Roque.

“In the same way, magagamit din po iyang national ID system para maiwasan iyong fraud diyan sa PhilHealth kasi at least malalaman natin kung buhay o patay iyong isang nagki-claim ng benefit,” dagdag na pahayag nito.

Sa ulat, plano ng National Economic and Development Authority (NEDA) na magsagawa ng pre-registration sa national identification system sa Oktubre.

Ayon kay NEDA chief Karl Chua, unang target muna nilang mairehistro ang nasa 5 milyong mga Filipino.

Aminado ito na isang malaking hamon ngayon ang COVID-19 pandemic.

Isasagawa muna nila ang pre-registration para pagdating ng registration ay hindi na sila mahihirapan pa.

Sa 2021 budget ay mayroong inilaan na P4.1 billion para sa implementasyon ng national ID system sa bansa. (Daris Jose)