P1 B fuel subsidy para sa mga drivers sinimulan na ang pamamahagi

Sinimulan na ng Land Transportation Franchasing and Regulatory Board (LTFRB) ang pamamahagi ng P1 Billion na fuel subsidy sa mga drivers ng public utility jeepneys (PUJs).

Inaasahan na matatapos ngayon December ang pamamahagi ng fuel subsidy sa may 136,230 na PUJ drivers.

Ayon kay LTFRB OIC ng legal division Zona Russet Tamayo na ang Land Bank of the Philippines ay nagiimprenta na ng mga cards para sa Pantawid Pasada Program (PPP cards) para sa unang 51,000 na beneficiaries.

Sa ngayon, mayron nang 85,000 na mga jeepney drivers ang nakakuha na ng ayuda mula sa PPP ng pamahalaan. Bawat jeepney driver ay mabibigyan ng P7,200 na cash subsidy.

Noong nakaraang buwan ay sinimulan na ang pamamahagi ng cash assistance sa mga jeepney drivers upang matulungan sila ngayon panahon ng pandemya at ng mabigyan sila ng tulong dahil na rin sa tumataas na presyo ng krudo at iba pang petroleum products.

“Jeepney drivers would continue to receive fuel subsidy even if the prices of petroleum products in the market are decreasing,” wika ni Tamayo.

Kamakailan lamang ay giniit ng isang Senador sa pamahalaan na muling ibalik ang fuel subsidy na dating binibigay sa mga jeepney drivers at operators sa ilalim ng programang Pantawid Pasada ng pamahalaan.

Sinabi ni Senator Sherwin Gatchalian na dahil sa sunod-sunod na pagtaas ng diesel, gasoline at iba pang petroleum products kung kayat dapat lamang na ibalik ang fuel subsidy para sa mga jeepney drivers at operators.

Samantala, pinag-aaralan naman ni Department of Energy secretary Alfonso Cusi ang isang paraan upang mabigyan ng proteksyon ang mga consumers laban sa tumataas na presyo ng mga petroleum products at ito ay ang pag suspende ng pagpapataw ng excise tax. LASACMAR