Online sellers na ‘tax evaders’ iba-block ng BIR

Ayon kay BIR Commissioner Romeo D. Lumagui, Jr., pinaigting ng ahensiya ang kampanya laban sa mga Online Marketplaces, E-Marketplaces at Online Sellers dahil ngayon ang panahon na marami ang namimili online at malakas ang kita ng mga online businesses.

Alinsunod sa Section 115 ng National Internal Revenue Code na inamyendahan sa ilalim ng RA No. 12023, binibigyan ng kapangyarihan ang Commissioner ng BIR na suspendihin ang mga operasyon ng negosyo kasama ang pag-block sa digital services at mga digital service provider sa Pilipinas na hindi nagbabayad ng tamang buwis sa pamahalaan.

Aniya, oras na mapatunayan ng BIR na lumabag sa batas sa pagbubuwis ang naturang mga negosyo, agad nila itong iba-block katulad ng ginagawa ng Oplan Kandado program sa mga physical stores.

Paliwanag ni Luma­gui, nagbabayad ng buwis ang mga may tindahan o sari-sari store kaya dapat lamang na gawin din ito ng mga nagnenegosyo online.