• October 22, 2025 WordPress timezone: Asia/Manila
    Current date: October 22, 2025
    Current time: October 22, 2025 8:14 PM

  • Ang Diyaryong Pinagkakatiwalaan

OBRERO SUGATAN SA PULIS

SUGATAN ang isang 27-anyos na construction worker matapos makipagbarilan sa pulis na sumita sa kanya sa Caloocan city, kamakalawa ng gabi.

 

Kinilala ang suspek na si Kenneth Bryan Gelito ng 2938 A. Bonifacio St. Pag-asa, Brgy. 175.

 

Ayon kay Caloocan police chief P/Col. Samuel Mina, naganap ang insidente alas-9:20 ng gabi sa kahabaan ng T. Alonzo St. habang ang mga operatiba ng Intelligence Section ay nagsasagawa ng covert operation sa lugar kung saan laganap umano ang operasyon ng video karera.

 

Napansin ng isa sa mga operatiba na si Pat. Raymundo Sulit, Jr. si Gelito na kahina-hinala kaya’t sinita niya ito subalit, nagalit ang suspek at nagbanta sa pulis na hintayin siya at agad siyang babalik.

 

Makalipas ang ilang minuto, dumating si Gelito na armado ng “sumpak” at pinaputukan si Pat. Sulit subalit, hindi tumama na naging dahilan upang gumanti ng putok ang pulis at tinamaan sa kanang paa at hinlalato ang suspek.

 

Gayunman, nagawang makatakas ng suspek at naiwan ang kanyang baril sa lugar subalit, sa isinagawang follow-up operation ng mga pulis ay agad naman siyang nasakote. (Richard Mesa)