Notoryus snatcher nasakote sa Caloocan

Dahil sa mabilis na pagresponde ng mga tauhan ng Northern Police District (NPD) District Special Operations Unit (DSOU), agad naaresto ang isang umano’y notoryus na snatcher matapos hablutin ang cellphone ng isang estudyante sa Caloocan city.

Kinilala ni NPD-DSOU PMAJ Amor Cerillo ang naarestong suspek na nahaharap sa kasong paglabag sa RPC Art 294 (Robbery Snatching) na si Joel Banahon.

Ayon kay PMAJ Cerillo, dakong 10 ng gabi, nagsasagawa sila at kanyang mga tauhan ng surveillance at covert anti criminality operation sa Langaray St. corner Pampano St. Brgy. 14 ng lungsod.

Dito, napansin nila ang paghingi ng tulong ng biktimang si Daverson Bern Buhain, 19, estudyante, residente sa naturang lugar matapos agawan ng cellphone ng suspek.

Mabilis namang rumesponde si Major Cerillo at kanyang mga tauhan saka hinabol ang suspek hanggang sa makorner nila ito at maaresto kung saan nang kapkapan ay mabawi sa kanya ang cellphone ng biktima. (Richard Mesa)