NHA, SINURI MGA PROYEKTONG PABAHAY PARA SA MGA PAMILYANG MAAAPEKTUHAN NG IMPRASTRAKTURA

PERSONAL na ininspeksyon ni National Housing Authority (NHA) General Manager Joeben A. Tai ang tatlong proyektong pabahay sa Ipil, Zamboanga Sibugay, bilang bahagi ng patuloy na pagtitiyak ng ahensya na magkaroon ng maayos at napapanahong relokasyon ang mga pamilyang maaapektuhan ng mahahalagang proyektong pang-imprastraktura ng pamahalaan.

Kabilang sa mga sinuring proyekto ang Gentle Breeze Subdivision sa Barangay Upper Pangi, na nakatakdang maging tahanan ng 710 informal settler families (ISFs) na maaapektuhan ng konstruksyon ng DPWH Coastal Road Project; ang ipinanukalang Paglaum sa Magdaup Project sa Barangay Magdaup para sa 127 pamilyang maaapektuhan ng pagpapalawak ng Ipil Port; at ang Ipil Fisherman Resettlement Project sa Barangay Buluan, na maglalaan ng 307 residential lots para sa mga kwalipikadong benepisyaryo.

Kasama ni GM Tai sina Region IX Regional Manager Engr. Al-Khwarizmi U. Indanan, Zamboanga City/Zamboanga Sibugay/ARMM B (Basilan, Sulu at Tawi-Tawi) District Manager Atty. John Louie G. Rebollos, at Zamboanga del Sur/Zamboanga del Norte/ARMM A (Maguindanao at Lanao del Sur) District Manager Engr. Jessa M. Consuegra sa isinagawang inspeksyon. Dumalo rin ang mga kinatawan ng Pamahalaang Bayan ng Ipil at si Ar. Yasser P. Anduhol, na kumatawan kay Congresswoman Marlesa Hofer-Hasim ng Ikalawang Distrito ng Zamboanga Sibugay, bilang patunay ng patuloy na pagtutulungan ng NHA at ng mga lokal na katuwang nito sa pagpapatupad ng mga programang pabahay.

Sa pamamagitan ng site inspection, sinuri ng NHA ang mga natukoy na lokasyon upang matiyak na ang mga programa sa relokasyon ay nananatiling tumutugon sa pangangailangan ng mga pamilyang maaapektuhan ng mga proyektong pang-imprastraktura ng pamahalaan. Ipinapakita rin nito ang patuloy na pagtataguyod ng ahensya sa pagbuo ng ligtas, maayos, at napapanatiling mga komunidad na magsisilbing panibagong simula para sa mga benepisyaryo habang isinusulong ang pambansang kaunlaran.

Bilang attached agency ng Department of Human Settlements and Urban Development (DHSUD), nakatuon ang NHA sa pagpapatupad ng makatao, inklusibo, at napapanatiling mga programa sa relokasyon na kaakibat ng bawat pangunahing proyektong pang-imprastraktura, bilang suporta sa adhikain ni Pangulong Ferdinand R. Marcos, Jr. na isang Bagong Pilipinas. 

(PAUL JOHN REYES)