NHA PINAPAALALA ANG MGA PAYMENT OPTIONS PARA SA MGA HOUSING BENEFICIARIES NITO

PINAPAALALA ng National Housing Authority (NHA) ang mga iba’t-ibang payment options para sa mga housing beneficiaries nito upang makatulong sa kanilang pagbabayad ng buwanang amortisasyon.

Ngayon ngang accessible na ang pagbabayad ng amortisasyon sa NHA sa pamamagitan ng GCash at ECPay application system, mas napadali at napasimple nito ang sistema para sa mga pamilyang benepisyaryo ng pabahay. Ang digital payment ay nagdulot ng katipiran sa oras sa byahe at sa pamasahe para sa mga benepisyaryo.

Sa kanyang pahayag, sinabi ni General Manager Joeben A. Tai na layunin ng NHA na palakasin ang payment network ng ahensya sa pamamagitan ng pagdaragdag ng higit pang mga alternatibo sa pagbabayad, na bahagi ng NHA Online Payment Gateways (OPG) sa ilalim ng kanyang administrasyon.
“Sa pagbubukas ng bagong taon, patuloy po ang pagsusumikap ng NHA na mas palakasin ang payment methodologies tulad ng pagpapatibay ng aming digitalization efforts upang gawing makabago at i-streamline ang aming mga proseso, partikular na sa pagbabayad ng buwanang amortisasyon na mas makakatulong sa mga benepisyaryo ng aming mga proyektong pabahay,” GM Tai shared.
Muli ring iginiit ni GM Tai na may umiiral ng partnerships ang NHA sa mga major e-payment services at applications, tulad ng Maya Philippines, Green Apple Technologies & Systems, Inc., ESP Collection Agency, Link.BizPortal, at iba pang mga over-the-counter partners tulad ng Bayad Center at 7-Eleven.
Ang gawaing ito ay naaayon sa mga hakbangin ng pamahalaan sa pagpapabuti ng mga transaksyon at proseso na nakabalangkas sa Republic Act 11032 o ang Ease of Doing Business and Efficient Government Service Delivery Act of 2018; at mga layunin ng digitalization sa pamamagitan ng Republic Act 8792 o ang Electronic Commerce Act of 2000.
Sa kaugnay na balita, pinaalalahanan ng NHA ang mga housing beneficiaries na nag-avail ‘Condonation 7’ program na pag-ibayuhin ang pagsunod sa skedyul ng buwanang hulog upang maiwasan ang penalties at interests at tuluyang makinabang sa benepisyo ng programa. Nagtapos ang ‘Condonation 7’ noong Disyembre 2025.
Nananatili pa rin at maaari pa ring magbayad ng amortisasyon sa mga cashiers na matatagpuan sa NHA offices. Nagsusumikap ang NHA na makapagdevelop pa ng iba pang payment options upang mapagaan at mapadali ang pagbabayad ng mga pamilya ng kanilang bayarin sa pabahay. Kasunod nito, ang hangad ng digital payments na mapataas pa ang collection efficiency ng NHA, kung saan maaari pang makapagtayo ng iba pang pabahay mula sa pondong malalakap. (PAUL JOHN REYES)