Nasa 27 milyon ang estudyante ngayong school year 2025-2026 sa public schools…  Buong gobyerno, kumilos sa pagbubukas ng klase- PBBM

TINIYAK ni Pangulong Ferdinand R. Marcos Jr., araw ng Lunes sa mga public school teachers na ang buong gobyerno ay kumilos para suportahan ang ligtas at maayos na pagbubukas ng klase para sa School Year (SY) 2025–2026.

Sa katunayan, tinugunan at tinutugunan ng iba’t ibang ahensiya ng pamahalaan ang mahahalagang education-related concerns.

Sa pagsasalita via teleconference sa mga guro sa iba’t ibang bahagi ng bansa matapos inspeksyunin ang Epifanio Delos Santos Elementary School sa Malate, Maynila, binigyang diin ng Pangulo ang whole-of-nation approach ng gobyerno para sa pagpapabuti ng mga kondisyon sa pag-aaral.

“Ipapaalala ko sa inyo na ang buong pamahalaan, lalo na basta sa edukasyon, lahat ng ating departamento hanggang DOH (Department of Health), DSWD (Department of Social Welfare and Development), DTI (Department of Trade and Industry), DOTr (Department of Transportation)… ay nakabantay ngayon sa inyo dahil ito na ang pinakaimportante naming ginagawa,” ang sinabi ng Pangulo.

Binigyang diin din ng Punong Ehekutibo ang pagha-hire ng mga bagong tauhan para suportahan ang mga guro na tutukan lamang ang pagtuturo sa mga estudyante sa pamamagitan ng pag-alis sa kanilang administrative work.

Sa kabilang dako, hinikayat naman ng Pangulo ang mga guro na i-report ang gaps o mga usapin direkta sa Department of Education (DepEd) o sa kanilang local superintendents, nangangako ng agarang atensyon.

“Kung ano pa ang inyong nakikita na puwedeng pagandahin pa, sabihan niyo kami… para malaman namin,” aniya pa rin.

Pinasalamatan naman ng Pangulo ang mga guro para sa pagtiyak ng maayos na simula sa academic year.

Sa ulat, sinabi naman ni Dennis Legaspi, Media Relations chief ng Office of the Secretary ng DepEd, ang projected enrollment ng DepEd ngayong school year ay nasa 27 milyon.

Matatandaang una nang pinadali at ginawang cost-effective ng DepEd ang pagpapa-enroll sa basic education school. (Daris Jose)