NAGSULPUTANG PEKENG COVID VACCINE, BABANTAYAN NG NBI

NAGSASAGAWA ng monitoring ang  National Bureau of Investigation (NBI) para mabantayan ang pagpuslit ng mga nagsulputang  pekeng  Covid-19 vaccines sa bansa.

Kaugnay nito, sinimulan na rin ng NBI ang imbestigasyon sa importation, selling at distribution ng Covid-19 vaccine na hindi dumaan sa tamang proseso at hindi aprubado ng food and Drugs Administration (FDA).

Una nang inatasan ni DOJ Secretary Menardo Guevarra ang NBI na magsagawa ng imbestigasyon hinggil sa ulat ng mga  pekeng mga gamot na nakakapsok sa bansa kasama na rito ang bakuna kontra Covid-19.

Matatandaang inihayag ni Pangulong Rodrigo Duterte na nabakunahan na ang ilang miyemro ng sundalo partikular ang Presidential Security Group (PSG) .

Sinasabing ang bakuna na donasyon mula sa China ang sinasabing itinutok sa mga sundalo at iba pang personalidad kung saan wala itong rehistro o hindi dumaan sa FDA at wala rin itong emergency use authorization.

Kabilang ang mga sundalo sa priority list ng gobyerno na makakatanggap ng bakuna sa sandalling dumating na ito sa bansa. (GENE ADSUARA)