Mula sa 17 rehiyon sa Pilipinas, nagsumite na sa DILG ng ‘unvaxxed list’

SINABI ng Department of the Interior and Local Government (DILG) na 12 mula sa 17 rehiyon sa bansa ang nagsumite ng listahan ng mga indibidwal na hanggang sa ngayon ay hindi pa rin nagpapabakuna laban sa coronavirus disease 2019 (Covid-19).

Ayon kay DILG Secretary Eduardo Año, ang data na ito ay naglalayon na payagan ang pamahalaan na itutok ang kanilang pansin sa mga komunidad, mga barangay at kanayunan na naiiwan na sa nagpapatuloy na Covid-19 vaccination program.

“Karamihan dito nasa lugar na malalayo so ito rin ang magiging strategy natin kung paano mapaaabot ang bakuna rito,” dagdag na pahayag nito.

Aniya pa, noong Pebrero 2 ay nagkaroon siya ng pagpupulong kasama ang local government units (LGUs) kung saan ang napag-usapan na ang mga naiiwang LGUs ay binigyan ng target na bilang ng mga taong kailangan nilang mapabakunahan.

Ang pamahalaan aniya ang magbibigay ng “appropriate focus” sa mga lugar na may mababang vaccination rates kung saan magdaragdag ng mga volunteers at mas marami pang bakuna ang ide-deliver.

Tiniyak din ng Kalihim ang suporta ng gobyerno lalo na mula sa Armed Forces of the Philippines, Philippine National Police, at Bureau of Fire Protection upang matiyak ang mabilis at ligtas na pagde-deliver ng mga bakuna.

Aniya pa, hindi titigil ang pamahalaan na isulong ang “massive information campaign” dahil sa kahalagahan na makapagbigay ng proteksyon laban sa virus sa pamamagitan ng Covid-19 jab na may layuning itaas ang public trust sa bakuna.

Samantala, target naman ng pamahalaan na mabakunahan ang 2 milyong indibiduwal para sa first dose at 4 na milyon naman para sa booster shots sa buong bansa sa isasagawang pangatlong ‘Bayanihan, Bakunahan’ edition sa Pebrero 10 at 11.

Sa ilalim aniya ng programa, may 1 milyong primary doses at booster shots ang inilaan para sa Kalakhang Maynila na sa kasalukuyan ay nasa ilalim ng Alert Level 2 hanggang Pebrero 15.

“Sana nga ay suportahan ng ating mga kababayan ang  ‘National Vaccination Day Part 3’ sa February 10 and 11,” anito.

Hinikayat naman ng Kalihim ang mga employers na payagan ang kanilang mga empleyado na makapaglaan ng oras na makapagpabakuna.

“In fact, dapat nga ay binibigyan pa sila ng incentives and their time off to get vaccinated, hindi ikakaltas sa kanilang leave,” dagdag na pahayag ni Año. (Daris Jose)