Motorcycle taxi rider na akusado sa panggagahasa sa Bulacan, nalambat ng NPD

SHOOT sa hoyo ang 35-anyos na motorcycle taxi rider na wanted sa kaso ng Rape at Sexual Assault nang masakote ng mga tauhan ng Northern Police District (NPD) sa manhunt operation sa Marilao, Bulacan.

Nakatala ang akusado bilang Most Wanted Persons sa Munisipyo ng Marilao, Bulacan dahil sa kasong tatlong bilang ng Rape at Sexual Assault in relation to Section 5(B) of R.A. 7610.

Nang makatanggap ng impormasyon ang mga tauhan ni NPD Acting Director P/BGen. Benliner Capili hinggil sa kinaroroonan ng akusado ay agad ikinasa ng mga ito ang manhunt operation sa koordinasyon sa Marilao Component Police Station.

Hindi na nakapalag ang akusado nang masukol ng pinagsamang mga operatiba ng District Investigation Division (NPD-DID), at District Women and Children Protection Desk (DWCPD) malapit sa kanyang bahay sa Barangay Ibayo, Marilao,Bulacan.

Inaresto ang akusado sa bisa ng warrant of arrest na inisyu ng Regional Trial Court Branch 121, Meycauayan, Bulacan, na walang inirekomendang piyansa para sa kasong Rape habang may piyansa naman na P200,000 para kasong sexual assault. (Richard Mesa)