Mister na wanted sa sexual assault sa Manila, nadakma ng NPD sa QC

MAKALIPAS ang mahigit apat na taong pagtatago, lumagapak na sa loob ng selda ang isang puganteng nahaharap sa kaso ng kalaswaan nang matiklo ng mgatauhan ng Northern Police District (NPD) sa Quezon City.

Sa ulat, nagawang matunton ng Tracker Team ni NPD District Director P/BGen. Josefino Ligan ang 43-anyos na si alyas “Ipe” na kabilang sa talaan ng Most Wanted Person ng Manila Police District (MPD) matapos inguso ng isang impormante.

Dakong alas-9:30 ng gabi nang tuluyang matimbog ng mga tauhan ni District Investigation and Detective Management Division (DIDMD) head P/Col. Allan Umipig ang akusado sa kanyang pinagtataguan sa Quezon City.

Si alyas Ipe ay nagtago na nang malaman niyang naglabas ng warrant of arrest laban sa kanya ang Manila Regional Trial Court (RTC) Branch 55 noong Agosto 1, 2021 para sa kasong sexual assault na may inilaang piyansang _120,000 para sa pansamantala niyang paglaya.

Kasalukuyan nakapiit ang akusado sa Custodial Facility Unit ng DIDMD sa Langaray St. Brgy. 14, Caloocan City habang hinihintay pa ang paglalabas ng kautusan ng korte para sa paglilipat sa kanya sa Manila City Jail. (Richard Mesa)